2022 cu Edith Stein ih Baptism a ngah nak kum 100 kum nak January 19, 2022

2022 cu Edith Stein ih Baptism a ngah nak kum 100 kum nak

January 19, 2022

            Edith Stein cu zo a si? Tuikum ah Catholic mi tiin Baptism a lak nak kum 100 a kim zo. Amah cu nunau philosophy mifim a si. Ahlan ah Catholic mi asilo nan netalam ah Baptism a ngah ih Mithianghlim tiang a cang. Curuangah a suah nak khuapi ah tuikum “2022 cu Edith Stein ih kum” tiin hminsin in an upat. Amah cu Jew nunau pakhat asiih, Auschwitz ah Pathian thu ruangah thah a rak tuar. Auschwitz cu Nazi Germany pawl in mipi tan 1 le hrek kha tuah daan a phunphun in an thah nak hmun a si. Thah a tuar tu ih zatek 90 Jew miphun pawl an si. Anmah lakah Edith Stein khal a rak tel ve mi pakhat a si. Tuikum cu a kum tiin hminsin in upat asiih, a nunram le that nak pawl vunmang sal dingah a si.

            Edith Stein cu 1891, atuah Wroclaw tiih kawh mi Polan ram ih thlanglam ah Jew innsang pakhat ihsin  a rak suak. Culai san ah a suahnak cu Breslaw tiiin an koih, German pawl kut sung ih an thlen caan a si. A kum 20 tiang Pathian a zum lo tu, biaknak nei lo dinhmun in a um. Fimthiamnak lamah a  zuam tu asiih, philosophy lamah doctor buaih a rak ngah. Netalam ah Catholic mi pakhat si dingah thu a rak bot cat. Cui thinlung cu khuitawk ihsin a ngah timi cu kum zabi 16 ah Carmelite Sister pakhat asimi Avila khuapi ih St. Teresa ih thu cu 1921 ah a rualpi pakhat ih inn ih a um laiah a rak siar. Cui cauk a siar hnuah a mah le mah a sim awk mi cu “himi cu a hman mi asi maw” timi a si thu, neta ah a zumnak thawn pehpar in a mah rori ih a ngan mi a nunram thuhla ah a sim. Cutiiin (1922, January 1) ah Baptism a rak ngah. Culaiah kum 30 a kim zo. Baptism a hmin khal thinglamta ih Teresa Benedicta timi a rak la. Baptism a ngah hnu kum 12 a rei ah Carmelite Sister si dingah ke a rak kar thok.

            Stein upat sunloih nak kum tiin Wroclaw ih bawm tu Bishop Jacek kicinski in tui thla ni 9 Bawi Jesuh Baptism a ngah nak puai zarhpi ni ah thla a rak cam theunak Diocese ah a rak phuan sak. Amah cu Bawi Jesuh ih pasca thuthuk asimi harsat a tuar nak, a thihnak le a thoh sal nak nunram kha thuk zet in ruat in a nung tu asi ruangah thinglamta ih Teresa Benedicta timi hmin cu lungawi zet in a rak la. Cuvekin a nung pi. Baptism a lak caan khalah a kum a upa thlangih Baptism sang dingih a suah tikah Pathian ih thu sim mi “himi cu ka duhdawt mi ka fapa a si. A thu ngai uh” timi tong kha tha zet in ngai in a thinlung sungah a pom. Amah cu Sr tlawng a um laiah Sr.Rosa tiih kawh mi a dang Sister pakhat thawn kaih a tuar. Sr. Rosa khal nehhnu ah Sister pakhatah a cang. Kaih an tuar caan ah Stein cu thinglamta ih St. John ngan mi “The Science of the Cross” (fimthiamnak thinglamta) hmin pek mi cauk a siar lai.

            Amah cu (1942, August 9) ah Auschwitz mi thatnak hmun ah thah a tuar. Amah cu St. John Paul II in 1998 ah Mithianghlim ah a khaisang ih, kumkhat a rei ah amah cu Europe continent a kilkhawi tu Mithianghlim tiin a sunloih. Amai kumupat nak in a suahnak khupi thuneitu pawl in a inn khal museum tiin an tuah ding. A tu caan ah Edith Stein ih inn cu biaknak tinkim thurelkhawmnak tiin an nemhnget. Himi thuthang cu CNA thuthang ihsin kan don mi a si.

https://bit.ly/344kzWY