Bawm a tul mi Kohhran pawl bawmtu pawlkom a simi ACN (Aid to the Churh in Need) in Myanmar ram hrangah thlacam sak dingah dil nak a nei

            Pope thawn pehpar mi foundation nisuah nak saklam Asia ram sung tuahmawh nak pawl cawl dingnak hrangah Pope ih dil mi cu sim sal a si. Leilung pumpi ih hmuhsuam nak le namnuai a tuar tu Khristian pawl a bawm tu ram tin Catholic biaknak pawlkom in Myanmar ram hrangah thla cam dingah an dil. Myanmar ram ah rampi ih hril mi cozah cu Feb 1 ah siatbal tu ralkap in thuneihnak a long hnu thla hnih luan tiang a hnok rero lai a si.

            “Leilung pumpi ih a ummi Khristian pawl in Myanmar ram cu nasa zet ih thinphan nak thawn zoh lawng hi an ti thei mi a si. Curuangah Pope Francis ih "tuahmawh nak cawl uh" timi dilnak cu kanmah pawl in nasa tak in kan pompi ve a si. A hleice in Easter puai caan ah hleice tak in thlacam cio uh” timi dil nak cu Catholic Kohhranpi ih Pope thawn pehpar mi foundation asimi bom a tul mi Kohhran bom nak “Aid to the Church in Need –ACN” president asimi Thomas Heine Geldren in a than.

            “March thla lai ah Asia ram fate ah Democracy cangvaihnak dodal ih thuneihnak longtu ralkap acozah in tuahmawhnak a tuahmi pawl parah Pope Francis in tuahmawh nak cawl dingin a dil tiin Heine Geldren in tlawngkai ni nga ah ACN website ah a ngan.

Nunnak a petu 618 an um zo

            Duhphorhnak neitu pawl parah Myanmar ralkap in thi hnai suah nak ah thihhlohnak pawl khumnak tuahtu, ramkhel lam ih tlawngkai pawl bom tu pawlkom AAPP in a liam zo mi tlawngkai ni nga tiang nun nak a cem tu 618 an um thu an sim. Ram mipi zaten 2931 an kilkhaiw lai ih, 54 cu thawng sungah an ret ih, 520 cu kaih ding in thu an suah. AAPP in a thi tu tampi ih hmin cazin lak ding a tanglai ruangah a thi tu mipum cazin a tam vivo thei thu an sim.

            ACN ih hnatuan tu lak ih hotu president in “Myanmar ramsung thuthang theih tikah ka thin a phang tiin a sim. “Himi zarhte, zarhpi ni pawl ah humhualnak tuanvo latu ralkap pawl ihsin thokin thuneih nak an lak thok caan hnak in an sual sinsin. Mipi humhim tu ding ralkap pawlin hriamhrei thilri pawl ralring cia in lamzin ih an hmuh mi tinkim kap dingah an man cia” tiin a sim.

Zamrang ten a dai lo ding

            Cumi cu thin nat thlak zet in “ram khel lam thuthei tu pawlih an sim nak vek in ralkap lam khal siseh, Democracy a duh tu mipi lam khal siseh dungsip dingah an tum hrih lo. Ralkap in remdaih nak le humhim nak hrangah minung pawl tuahmawh thei nak an nei tiin an mah le an mah an zum aw” tiin a sim. Cutiin mino pawl hoha mi lamzin zawh ih cangvaih nak cu mai ram kha ralkap thuneih nak ihsin luat dingah thu botcat nak a si. “Dinhmun a tha lo deuh deuh tiin Heine Geldren in ralrin nak a pe. Hiti vekih a timi hi thlarau lam zawngih zangfah lainatnak nasa zet ih dil nak a si. Thlacamnak nasa zet ih kan neih sinsin a tul. Remdaih nak thawn nel aw ding kan tul. Zangfah ten ni tin nan thlacam nak ah Myanmar mipi pawl hrang khalah bet in thla cam sak uh” tiin an dil.

Ruahsannak ih hminsinnak pawl

            Heine Geldren cu Myanmar Catholci Kohhranpi ih langsar ter mi pawl a hmuh ruangah ruah sannak tumpi a nei. Catholic Sister pakhat in tuahmawhnak cawl dingah zangfah dil phah in, ralkap ih tuah daan kham dingah khukbil lai zuk pawl in thinlung a khoih. Police le duhphorhnak tuahtu mipi pawl karlak ah protestant siangbawi thawn relkhawm nak ah a hlawhtling mi Catholic Puithiam pakhat khal huham a nei mi tahthimnak pakhat a si. Puithiam, Sister pawlih tuahtuannak pawl in tuanvo neitu pawl ih thinlung a nem ter ding tiin ruahsannak ka nei” tiin Heine Geldren in a sim bet.