Ai-awhtu pawl, a dang continent pawl ih Catholic Bishop pawlkom ai-awhtu pawl (October 16, 2022)

Ai-awhtu pawl, a dang continent pawl ih Catholic Bishop pawlkom ai-awhtu pawl, tahthimnak ah: Europe, Africa le Vatican ai-awhtu pawl an rak tel.

October 16, 2022

Conference ih tel tu pawl ai-awh lungawi thusimnak

           Nisuahnak lam Syro Malabar tidaan hmang mi India ram ih Cardinal George Alencherry in Thai Catholic Pawlpi le Catholic mipi pawl ih thazaang tha zet mi teette khan mi pawl a rak lawm mi cu ‘nan nih cu kohhran mipi malte lawng umnak Pawlpi a si lo. Nan nih cu Pathian thuthangtha phuannak ah tha tha zet Pawlpi nan si. Curuangah khal FABC pawlkom ih golden Jubilee thawn tuah tlang mi conference cu innteek ah cohlang in nan tuah thei. Nan mai apawknak, tirhsiannak, khual thatnak pawl in conference ih tel tu pawl an mang a bang ter theh. Nan mai zuamnak, thil tuah theinak, nan tuah mi pawl cu ziang tluk in nan lungrual ti siseh, Thai Catholic Pawlpi ih thazaang siseh a lang ter thu’ conference ih tel tu ai-awhtu pawl ai-awh in lungawi thu a rak sim.

Baan Pu Waan - Conference tuahnak hmun

           Hmun tha le thli thiang ngahnak hmun, ropi zet mi Bangkok Archdiocese ih Pawlpi cu Samphran ah a um. A umnak hmun cekci cu Baan Pu Waan tiah an ko. Direct ih kan leh  a si le ‘thlaici vorhnak hmun (lo le) thil ciinnak hmuan’ tiin duhsan a nei. Cui hmun ih tuanvo neitu cu Fr. Peter Supot Roeksujarit a si. Hi hmun cu (1995) ah Cardinal Michael Meechai Kitbunchoo in a rak thawh thu, a thawhnak tumtah mi cu thuthangtha phuang dingah tuah daan tulsam nak silhkhah phah in Pawlpi ih Biaknak lam, fimthiamnak, nunphung pawl ih bomnak si dingah le cui hmun hrangah khal thatnak pawl suak dingih a rak tumtah thu tuanvo neitu Puithiam in a rak sim fiang.

           ‘Phu Waan’ ih duhsan cu ‘thlaici vorhtu’ ti a si. Hi hmin cu Archbishop Joseph Khiamsun Nittayo in a nauhak lai ih a hmin a rak pek mi a si. A mah cu Thailand ram ih hmaisabik Archbishop a si ih Bangkok Diocese in a si.

           ‘Thlaici vorhtu’ ih thok cu Bible Cathianghlim sungih ‘thlaici vorhtu’ tahthimnak sungta hrambun mi a si. Hi hmun ih tumtahnak lehsal a si le hi hmun cu hmun tinkim ah feh uhla mi hmuahhmuah ih thinlung sungah Pathian ih tongkam vorhtu ding pawl suahnak hmun’ a ti duhsan a si thu a rak simfiang.

           A liam zo mi kum (27) hrawngah hi hmun cu conference tuahnak hmun, Brother pawl, thuthangtha phuang dingih timtuahnak hmun, Bible Cathianghlim zirhnak hmun, Diocese sungih tlawng pawl, university pawl, acozah hnatuan pawl bulpaak pawlkom pawl tivek an ra ih Pathian thu an ruahnak hmun ah an rak hmang. A hlan ah khal FABC vekin ramhuap dinhmun ih hmin nei mi conference pawl cohlang ih an rak tuah dah thu, hi hmun cu tu vekin ramhuap ih hmin nei mi conference pawl cohlang ih tuah thei dingah tumtah in Bangkok Cardinal ih hruaikainak thawn an rak rem sal nak hi kumkhat hrawng lawng a rei lai tiah a rak sim.

           Hi thuthang cu RVA thuthang ih kan ngah mi a si.

https://bit.ly/3VHJrdh