America President Joe Biden Bawi Jesuh Thi le Sa sang theinak a ngah bet ding tiin ruahsan nak nei June 19, 2021

America President Joe Biden Bawi Jesuh Thi le Sa sang theinak a ngah bet ding tiin ruahsannak nei

June 19, 2021

            America President Joe Biden cu Catholic Kohhran President pakhat a si. Amah cu America ramah President hril nak ah Catholic asinan President tiin hril mi a pahnih nak President a si. A pakhat nak cu President John F Kenedy a si. President Joe Biden cu nau kham nak, nau thlak nak tha a pe tu ramkhel party aiawh tu President a si. Himi thu thawn pehpar in America ih Catholic Bishop pawl in Bawi Jesuh Thi le Sa sang thei lo dingah nasa zet in an do dal. Cutivekin nauthlak nak tha a pe tu zovek Catholic sungih ramkhel lam hnatuan tu pawl siseh Bawi Jesuh Thi le Sa sang thei lo dingin thu an bot cat. Ziangruangahtile nauthlat nak cu Nu Catholic Pawlpi in nasazet ih a kham mi zirh nak a si. Amah thawn pehpar aw in America Catholic Bishop pawl ih thu botcat nak thawn pehpar in a hnen thu an sut tikah minung lam a dangten thuhla a si ih thu an botcat vekin a si lo ding tiin a rak sawn.

          America Catholic Bishop pawl pawlkom in an tuah theu mi thurelkhawm nak cu kan dung kar ah an tuah. Cui thurelkhawm nak ah nauthlak nak thu a pe tu Catholic sungih ramkhel lam hnatuan pawl Bawi Jesuh Thi le Sa sang thei le thei lo ding thu khal an rel khawm cih. Bishop pawl in ramkhel lam pawl cu Nu Catholic Pawlpi ih zirh mi pawl hnget khoh zet in thlun dingah an forhfial.

          Joe Biden cu America President thuanthu ah a pahnihnak Catholic President asiih, nauthlat nak zalen zet in a on lawng siloin sumpai bom nak pawl khal a thang in a tuah. America ram ah nauthlak nak cu ram sung zaten tuah thei nak cu tlunlam upa in kum 1973 ah an rak nemhnget zo. Cui thu botcat nak cu Roe v.Wade tiin mi in an thei tam. Atui America President le vice President tei cu cui thu botcat mi an pom thu an than. Cozah asilomi pawlkom pawl ihsin nauthlak nak hmang dingah bom nak paisa a kham tu Mexico khuapi ih tuahmi cu Joe Biden in tuletu a sim ringring.

          Ram sung ih nauthlak nak thu thawn pehpar aw in Joe Biden cu mai thu bot cat nak thawn nau a thla tu pawl khal sumpai bom nak cu 2022 hrang sumpai a pom zo. Cui thu cu 1976 kum ihsin thokin sumpai cem zat cu fund paisa in bom dingah a rak kham. A tui dinhmun thawn pehpar aw in "Gaudium et spes" Vatican a veihnih nak thurelkhawm nak ah nau von ihsin thok in minung nunnak tha ten kilkhawi ding. Cui dinhmun ah nauthlak nak le nauhak thah nak pawl cu sual tumpi a si" tiin an ti.

          Zumnak lam zirhnak pawl tuahnak zungih 2002 ih an than mi khal Catholic sungih ramkhel lam pawl thlun dingmi lam a hmuh. Thu an than nak ah Catholic sungih ramkhel lam pawl in Nu Catholic Pawlpi ih lam hmuh mi pawl thlun ding a si thu, ahleice in a thupi mi thuhla thawn pehpar in (Thathim nak ah - nauthlak nak, harsat tuar lai zoh ngam lo tivek si maw, mina tu in nat a tuar thie nawn loih dil nak ruangih thi ding ih tuahnak) Kohhran ih lam hmuh mi vekin thlun ding tiin an bet. Cardinal Luis Ladaria in America Catholic Bishop pawl pawlkom hnen May thla ih a kuat mi ca sung khalah Nu Pawlpi ih zirh mi thawn a kalh mi Catholic ram khel pawl thawn pehpar in a sim.

          2019 President hrilawk nak hrang me an zoh fel laiah Charleston ih Diocese pakhat ah Missa tuah laiah Bawi Jesuh Thi le Sa sang dingih a feh tu culaiih President asi dingmi Joe Biden Bawi Jesuh Thi le Sa a sang thei lo. Charleston ih Bawi Jesuh Thi le Sa sang thei nak cu Atlanta le Charlotte vekin a hmang. Cumicu "Catholic mi rampi hrang hnatuan pawl nauthlak kham nak, duh lo cing in forhfil nak a tuah tu pawl zaten Bawi Jesuh Thi le Sa sang thei lo dingah, ziangruangahtile thil tha lo tuah ih tha pek nak a si" tiin a si. Curuangah cumi vek pehtlaih nak a um sung Bawi Jesuh Thi le Sa sang thei nak colh ding tiin a sim. Himi thuthang cu CNA thuthang ihsin kan don mi a si. 

Photo courtesy of WGBH

https://bit.ly/3xEjA9f