America ram ih Catholic nunau pakhat Olympic zuamawknak cu July thla ah a zuam ve ding July 1, 2021

America ram ih Catholic nunau pakhat  Olympic zuamawknak cu July thla ah a zuam ve ding

July 1, 2021

          America ram ih Catholic nunau Olympic Grace McCallum cu a thiam nak thawn Catholic pakhat dinhmun in tui July thla ih tuah dingmi Olympic puai ah a tel ding. Amah cu a mai Rosary thawn a mai hangah a danglam zet mi Thinglamta tel locun khual tlawn nak nai te le hla pi a feh dah lo thu, cui Thinglamta cu a pi hnen ih a ngahmi Biak nak lam ro thil a si thu cu 2019 Minisota ram a lai lak ih suak Catholic Magazine ah a rak tarlang. Cui Biak nak lam thil pawl ken ringring nak thawng in ramdiah nak le hnangam nak  a ngah ter tiih a ruah thu a nu ih sim nak vekin tarlang a si.

          Tuah cun a kum 18 lawng asi lai ih tui kum ah Tokyo ih tuah dingmi Olympic zuam awk nak ah America aiawh nunau 6 sungin pakhat a si. Amah cu tidai sung ih lam cu Simone Biles, Sunisa Lee le Jordan Chiles pawl thawn an zuam aw ding a si. Amah cu phunsang tlawng kai ding ah kan dung bai te ah tlawng a rak ap. Amai innsungsang pawl cu Isanti Diocese, St.Elizabeth Ann Seton ih parish ihsin a siih Sanday le Ed pawl an si. Amah cu suah pi unau 5 a nei. Anmah pawl cu Rachael, Madelyn, Joseph, John le Xavier pawl an si.

          A mai innsang pawl in thlacamnak ih thil ti thei nak an zum. Thlacamnak in a fa ih leh zuam awk nak cu danglam zet ih thlengawknak ah a rak can ter. Curuangah thlacamnak cu ziang vek dinhmun ah siseh, thupit ih nunpi dingah, tuah dingin a rak zirh theu thu, leh zuam awk nak cu a thupi zet. Asinain, an mah dinhmun in thlacam nak siar lo ziang hman ti thei mi an nei lo tiih miih rel nak khal an lungkim.

          2019 America ah Champion a rak ngah lai ah a mah tel in a innsungsang pawl in St. Philomena ih thlacam sak nak an rak dil. An mai a veihnih nak zuamawknak cu August 11 a si vek in cui ni cu St. Philomena ih puai ni khal a si.Thlacamnak ih thil ti thei nak an zum ruangah cui zuamawknak ah dar tacik a rak ngah thei. Thlacamnak ih huham a zum lo tu pawl hranah thil remcang tiin ti a theih ko nain innsungsang hranah cun St. Philomena ih thlacam sak nak ruangah a si.

          A nu in zuamawknak hrangah a fanu thawn khual an tlawn tinten an thlen nak ih Biakinn ah an khawm theu. Biakinn ah a fanu hrangah thin dai ten thla a cam sak theu tiin thlacamnak ih huham a zumtu a nu in thusuh awk nak ah a rak sim. A fanu khal in Pathian in hi lehnak ah thiamnak I pek ih tha zet in ka hmang ding. Uang awk nak ah a si lo tiah a sim.

          Olympic leknak cu July 23 ah an thok dingih nunau pawl lam zuam awk nak khal cu July 25 ah an thok thlang ding a si. Hi sungah Grace McCallum in zuamawknak cu a tha bik ih zuam thei dingah a zuam rero. Curuangah Grace McCallum in neh nak a ngah thei nak dingah thlacamnak thawn bawm cio uh si.

           Hi thuthang cu CNA thuthang ih kan ngah mi a si.

https://bit.ly/3xik7he