Anglican Bishop hminthang pakhat Catholic Kohhran sung lut (October 14, 2021)

             Canterbury Archbishop si ding tiangih rak ruahmi Anglican Bishop hminthang pakhat, Rev. Michael Nazir-Ali (Anglican Bishop hnatuan ihsin cawl zo mi) cu Catholic Kohhranpi sungah a lut ngah fel zo a si. Rev. Michael Nazir-Ali cu England ram, Rochester khuapi ih Bishop pakhat a rak si dah ih atu ahcun Personal Ordinariate of Our Lady of Walsingham timi pawlkom sungah a lut zo ti’n The Spectator Magazine in October 14 ah a tarlang. Personal Ordinariate of Our Lady of Walsingham timi pawlkom cu 2011, January 15 ah Pope Benedict XVI in England ram le Wales ram ih ummi Anglican Kohhran ihsin Catholic Kohhran sungih rak luttu pawl hmuahhmuah kha anmaih Anglican Kohhran sungih Bishop le Siangbawi tuancia pawl thawn finkhawm in a rak dinmi pawlkom pakhat a si. Himi Catholic pawlkom pakhat sungah Anglican Kohhran ihsin an rak ngahmi ro sunglawi pawl hlon thluh tul lo te’n an fehpi thei a si. The Spectator Magazine ih a tarlangnak ahcun, ordinariate pawlkom sungah Rev. Michael Nazir-Ali cu pawlkom ih lubik a simi, Msgr. Keith Newton in September 29 (St. Michael le Vancungmi pawl sunloihni) ah a rak cohlang ti a si. 

           Cule, Pope ih thupeknak thawn ordinariate pawlkom sungah Catholic Siangbawi cannak khal a daan vekin pek a si cih ding. Rev. Michael Nazir-Ali cun, “Anglican pakhat ih Tirhthlah pawl, zumnak hmaihruaitu pupa pawl le Council thurelnakpi pawl ih zirhnak vekih thlun duhnak thinlung hi himi ordinariate pawlkom sungah fek teih kilhim a theih ding ti’n zumnak ka nei” ti’n a sim. Cuihleiah, himi pawlkom sungah Catholic zirhnak thawn a kalh awlo mi Anglican ro sunglawi pawl kilhim ding timi hin thazang i ngahter ti khal in a sim. Kan dung thla sung ah Ebbsfleet khua ih Anglican Bishop rak tuan dahtu Rev. Jonathan Goodall khal Catholic Kohhran sungah a ra lut ve zo a si. Anih khal cu, caan reipi thlacamnak a neih hnu ah Catholic Kohhran sungih lut dingin thu a rak botcatmi a si thu a rak sim. Rev. Michael Nazir-Ali cu 1949 kum ah, Pakistan ram, Karachi khua ah a rak suak ih Catholic tlawng ah fimthiamnak rak zirmi khal a si. Anih hi Christian le Muslim rawicokmi background ihsin rami a si ih, British le Pakistani rammi sinak neimi khal a si.

          1976 kum ah, Anglican Siangbawi cannak a ngah ih Karachi le Lahore khua pawl ah Pathian hna a rak tuan. Lahore Cathedral ah tuanvo a rak nei ih West Punjab ih ummi Raiwind ih hmaisabik Bishop dinhmun ah khaisan a rak si. 1994 kum ah, Rochester ih Bishop dinhmun in tuanvo pek a si. Fate pahnih neimi innsangpa khal a si ih, 1999 kum ihsin Britain’s upper house of Parliament ti ih kawhmi, House of Lords sungtel pakhat dinhmun in tuanvo a nei ve. Anih hi Anglican le Roman Catholic pawlkom ih hnatuannak khal ah rak tel theumi rinsantlak pakhat khal a si. Cule, 2002 kum ah U.K media in Canterbury ih Archbishop, George Carey hnatuan sawngtu lak ihsin uar um bik pakhat a si ve ti’n a rak tarlang dah. Atu ahcun Oxford Centre for Training, Research, Advocacy, and Dialogue (OXTRAD) timi pawlkom hotu dinhmun in hna a tuan rero tu a si. 

          Rev. Michael Nazir-Ali thawn pehpar in Msgr. Keith Newton in, “Anih hi 2011 kum ih ordinariate pawlkom rak din thok ihsin UK sungah himi pawlkom ih thansonak ding rak duhsak zettu a si. Ordinariate of Our Lady sungtel pawl kan zate in, Catholic Kohhranpi sungih a ra luhnak le a reihlan ih Catholic Kohhran sungah Siangbawi cannak a ngah dingmi parah kan lung a awi cio a si” ti’n a rak sim. Ordinariate pawlkom sungtel Siangbawi pakhat a simi, Fr. James Bradley in kan dung thla ih a tarlangmi vek a sile, 1992 ihsin tuini tiangah Catholic Kohhranpi sungih a ra luttu Anglican Bishop pawl cu a tanglam vekin an si:

         Graham Leonard(London); Conrad Meyer; John Klyberg (Fullham); Richard Rutt (Leicester); John Broadhurst (Fullham); Edwin Barnes (Richborough); Keith Newton (Richborough); Andrew Burnham (Ebbsfleet); David Silk; Paul Richardson; John Goddard (Burnley); le Jonathan Goodall (Ebbsfleet) Rev. Michael Nazir-Ali in a simmi cu: “Pakistan ih ummi Kohhran sungah siseh, Middle East ah siseh, England ih ummi Kohhran sungah siseh, Wider Anglican Communion sungah siseh, Pathian hna ka rak tuanmi hi a sunglawi tuk. Tuitum ih thilcangmi hi kan zate ih kan tawmawkmi kan Bawipa le a miphun pawl riannak ah hmailam ih keh a kar bet mi a si ti’n ka hmu. A tu rori ahcun, Kohhran tinkim hrangih thla ka cam rero vekin keimaih hrang khal ah thlacamnak in neihsak ve ding ka lo dil duh” ti a si. Bawipa le a minung pawl hrangah riantu tha si thei ringring dingin thlaza kan camsak cio pei. 

https://bit.ly/3aKeSNC

Hram: CNA