Aralai dingmi July 25 ni cu aveikhatnak Pi le Pu pawl ih ni tiin Pope Francis in a nemhnget (April 20, 2021)

Aralai dingmi July 25 ni cu aveikhatnak Pi le Pu pawl ih Ni tiin Pope Francis in a nemhnget

April 20, 2021

         Aralai dingmi July 25 ni cu leitlun huap in a voikhatnak Pi le Pu, kum upa pawl sunloih ni a si ding. Cuih sunloihnak puaipi cu Pope ih hohanak thawn tuah a si ding.

          July 26 ni cu kan Myanmar ram Catholic Kohhranpi dinhmun ah Nu le Pa sunloih ni ti'n kan hmang ih a tu ahcun cumi ni thlen hlan nikhat asimi July 25 niah tuikum in thok in aveikhat nak Pi le Pu pawl sunloih ni tiin Pope Francis in nemhnget in a than. July 26 cu Bawi Jesuh ih pi le pu asimi St.Joachim le St.Anne tei ih puai ni asiih cumi ni ah nu le pa pawl puai ni, nu le pa sunloih ni tiin Myanmar ram vek Catholic Pawlpi pawl ah an rak tuah.

         Pawlpi cu kum a upa, pi le pu pawl thawn nai aw in an um tlang timi a lang ter tu tiin Pope Francis in St. Matthew Gospel Cathianghlim sungih "nangmah thawn ka um ringring" timi catlang cu cuini hrangah thutlangpi ah a hril. Himi thutlang cu mino fale pawl hrangah kum upa pi le pu pawl ih nunram thawn um tlang nak thu cah nak asiih kum upa pawl hrang khal ah himi thutlang cu Pawlpi sungah mino fale pawl lamhmuh hoha rero tu anmah pawl ih thuhla ralrin pek nak a si tiin a sim. Leilung pumpi ih Catholic zumtu pawl cu himi puaini hrangah a tul mi pawl timtuah in a tel tu pawl hrangah a danglam mi ni a si ding tiin Vatican in ruahsan nak a nei. Himi thuthang cu Rome Reports thuthang ihsin kan don mi a si.