Assisi khuapi ih a tlawng tu ding Pope Francis ih khualtlawnnak caanserh suah. (November 8, 2021)

Assisi khuapi ih a tlawng tu ding Pope Francis ih khualtlawnnak caanserh suah.

(November 8, 2021)

         Pope cu a ralai ding mi tlawngkai ninga ni, November 12 ah Assisi khuapi ah khual a tlawng ding. A khualtlawnnakih tumtah mi cu ‘ram tinkim thawn pehpar mi farah harsa pawl sunloih ni’ hmang dingah a si. Assisi khuapi cu a hlan ah hlawnthil tam in a rak mawi tuk nan Bawi Jesuih dung thlun dingah a ziang kim rak tansan tu St. Francis ih suahnak khuapi a si. Tui a khualtlawnnak cu mipi thawn tongaw dingah si lo in leitlunhuap ih mifarah pawl ai-awh tu minung 500 thawn lawng tong aw dingah a si. Cui tonawknak caanserh ah Pope in cui ai-awh tu pawl ih sim mi pawl a ngai sak ding. Cui farah harsa pawl ai-awh tu pawl cu Europe in an si.

         Pope ih Europe ram tluan ihsin farah harsa pawl ai-awh tu pawl thawn tonawknak caanserh cu a tanglam vekin a si. Zing nazi 9:00 am ah Pope Assisi khuapi a thleng ding. Thu nei tu pawl in Pope cu St. Francis Assisi Basilica Biakinn sungah hmuahnak an tuah ding. Cu vekin mifarah pawl ih ai-awh tu pawl khal Pope hmuahnak ah siseh, khualtlawnnak kawrfual le kianghrol pawl an hlu ding. Hi laksawng pawl ap nak cu St. Francis ih suahnak khuapi ah mikhual dinhmun in a thleng ih a tong ngai dingah a si tiin duhsan lang ter nak ah a si.

Basilica sungah caanserh tuahnak

         A feh tu ai-awh tu paruk pawl in an nunram an khuasak daan Pope an sim ding. Cui paruk sungin pahnih cu France ram in, pakhat cu Poland ram in, pakhat cu Spain in, a dang pahnih cu Italy ram in an si. An thu sim mi pawl a ngai theh in Pope in an mah thawn thu a rel tlang sal ding.

         Zing nazi 10:30 am ah Pope thawn a tongaw tu ai-awh tu pawl suncaw an do ding. Zing 11:00 am ah Basilica Biakinnpi ah an feh sal dingih Pope thawn thlacam tlangnak nei phah in Pope ih pek mi laksawng an cohlang ding. Cui hnu ah Pope cu vanzam thawn Vatican ah a kir sal ding. Asinan, hrekkhat farah harsa pawl ai-awh tu pawl cun Assisi khuapi ih Bishop Domenico Sorrentino thawn sun caw an ei tlang ding.

         Hi thuthang cu Vatican ih kan don mi a si.  

https://bit.ly/3CVYLZY