Bangkok ah Asian Continental Synodal Assembly tuah thok.

asian_continental_assembly

Bangkok ah Asian Continental Synodal Assembly tuah thok.

        Baan Phu Waan (The Sower's House) cu Bangkok Archdiocese ih a ropi ih a tum zet mi biaknak lam thu zir nak hmun pakhat a siih Feb 24 ihsin 26 tiang Asia continent ih thurelkhawmnak inntek tiin cohlang in tuahnak hmun a si ding. Thurelkhawmnak ih a tel tu aiawh tu pawl cu ram ih zir in Bishop pawl pawlkom 17 ihsin thurelkhawmnak aiawh tu pawl, Catholic pawlpi lam Bishop pawl pawlkom ihsin Bishop 2, Asia continent Bishop pawl pawlkom (FABC) dinnak ram 29 aiawh tu Bishop pawlkom pawl an tel. Himi thurelkhawmnak ah Cardinal 6, Archbishop 5, Bishop 18, Puithiam 28, Sister 4 le kohhran sung mi menmen 19 an tel.

          A tum bik le mipum tam bik nak asimi Asia cu a bangaw lo mi nunphung pawl, tong pawl, miphun pawl le biaknak pawl thawn a sunglawi zet. Christian biaknak cu Asia ih hmun a tam sawn ah mi mal sawn an sinan, pakhat ciar nunphung pawl ah phurnak le neihnak pawl pawlpi ih nunnak hrang a thar ter. Zumnak pawl, mahlemah, innhnen, leilungpi thawn pehtlaihnak ih Asia ih man neih nak cu cumi pawl thawn miphun innsang ih lungrualnak le Asia rammi pawl ih lungrualnak a keng.

          Harsat nak a um nan thurelkhamwnk cu Catholic pawlpi hrang thluasuah le damternak tiin zum a si. “Thlam vek asimi Pawlpi” ih sidaan cu cumi ah zaten tel theinak thinlung thawn tuahthei mi beunak hmun pakhat tiin ti a si. Tuahmawhnakpawl, remdaihlonak pawl le farah nak pawl telin Pathian ih thlarau umnak hmuntinkim ah Pathian in a inn a sak thei timi khal a lang. A thupi bik mi cu Pathian ih inn sungah mi tinkim harng hmun a um. Zo hman a tan lo. Himi ah a hlan ih tan kan tuar tiin a tuar tu pawl a tu ah a tha ih a him mi hmun asimi hi Pathian ih inn ah an hrang ah hmun a um timi an thei.

          Thlam inn ih pungsan cu minung sinak a lak nak ihsin kan lak ah Jesuh Pathian cu a inn a sak zo thu khal in thei ter. Curuangah Pathian ih thlam khal Pathian thawn siseh, khat le khat khal siseh tonawknak hmun a si. A tu ah zate ih inn tiiin hmuh mi inn cu tikhloihnak thluasuah kan co nak le kan neih mi thil in hmang ter sal. Thurelkhawmnak cu pawlkom pawl komkhawm awknak tiin hmunkhat ten ke kar nakih a thupit nak langsar zetin thei in pawlpi ih sinak thangsonak a lang ter.

          Aiawh tu pawl hmunkhat ten khualtlawng tlang dingah, thlacamnak thawn thleidang thiam dingah, relkhawmdingah le zoh fel thiam dingah bawm dingah thu an tuah. Aralai ding mi nithum sungah a iawh tu pawl cu an lungawi nak, hmunkhat ten ke kar nak ih hmuhton mi, natnak pawl ih hmuhton mi le lamzin thar pawl cohlang dingah sawmnak pawl an hlawm aw ding. Anmah pawl cu Asia continent ah pulhnat a cang ter tu thil tha lo pawl nun tu khuasak nak lam thu thurel tlangnak, thu bot cat nak, Puithiam pawl ih nunram ah hruainak pawl, mino, mi harsa pawl, biaknak lam buainak le Clericalism pawl khal thupi ah ret in an rel khawm ding.

          On puai Missa raithawinak asimi Thiang Thlarau Pathian hnen hlan mi Missa cu Japan ram, Tokyo Archdiocese le Asia continent Catholic  Bishop pawl pawlkom ih secretary Archbishop Tarcisio Isao Kikuchil SVD tei in an hoha ding. Cuihnu ah thuruahkhawmnak le thlei dang thiam nak lam thuluu pawl thawn aiawh tu pawl hnen lamhmuhnak pawl an tuah ding. Thurelkhawmnak ih a tel tu aiawh tu pawl ih ruahnak pawl hlawm aw dingah netabik ca pawl khal an hlawm aw ding.

Asia mi pawl tiin hmunkhat ten kekar nak cu kan ruahsan nak a si.

https://bit.ly/41ieuPP

Add new comment

2 + 12 =