Bangladesh ah Italy mi Pathian riantuan tu Paolo Ciceri cu a kum 80 ah nunnak cem. (November 17, 2022)

Bangladesh ah Italy mi Pathian riantuan tu Paolo Ciceri cu a kum 80 ah nunnak cem.

(November 17, 2022)

           November 9, Italy ram Rancio di Lecco ah Bangladesh ram ih kum 40 luan lai Pathian riantuan tu Italy Puithiam pakhat a nunnak a cem. Amah cu kum 80 a si zol Fr. Paolo Ciceri cu the Pontifical Institute for Foreign Mission (PIME) sungtel a siih, Bangladesh ram ah mi farah le miphun mi malte hrang ahleice in rian tuan tu a si.

           1973 ah Bangladesh ah a thleng ih, a hleice in rampi ih saklam Rajshahi le Dinajpur Diocese ah Pathian riantuan in kum 44 caan a hmang. 2017 ah a harhdamnak zoh fel dingah Bangladesh in Itlay ah a rak tlung. Ram ih mi pawl hrangah a hrampi tul mi leiram le nunphung thangsonak pawl cu Bangladesh Kohhran hrang danglam zet in a rak bawm.

           Amah bawm tu tiin amah thawn hnatuan tu Fr.Carti Pierfrancesco ih a sim mi cu “hmaisabik Bangladesh ah kum thum ka um hnu ah Fr.Paolo Ciceri thawn kum 5 a hnen ah caan ka hmang. Aliam zo mi kum 8 ah a damlai mi Mithianghlim thawn um vekin ka ruat aw. Amah cu kan dung zarh ah vancungram ah a kai tu a si.

           Amah Puithiam cang dingih a ko tu le mission hnatuan dingih a ko tu Jesuh hnen ih a ral that nak ka hmu. Amai Parish sungih retreat a tuahnak pawl, thuthangtha hrang  a timtuahnak , sualthlahnak, Bawi Jesuh Thi le Sa le thlacam nakih a zuamnak pawl cu ruat hman ka ruat thei lo” tiin PIME Puithiam Pierfrancesco in a sim.

           Bawm tul mi pawl hrang taksa in siseh, hmuhtheih, langsar zet ih a duhdawt nak ziangtluk in a ral tha timi cu ka hmuh mi rori a si. Bangladesh ramah Rajshahi khuapi ih a vai mi pawl le mi duh lomi le fih mi pawl hrangah Fr. Ceciri in a hmaisabik a rak cohlang ih, cuihnu in cui khua ih tlawng inn sak nak le mina pawl tuamhlawmnak pawl a rak din” tiin Pierfrancesco in a sim.

           Buainak ih bom a tul mi pawl le mi farah pawl cu amai buainak vekin an cangih an buai nak pawl felfai ter sak dingah a zuam ringring. Mi ziangzat a bawm, ziangzat a run, a thi pawl khal tidai vekin mi hrang a hlu ih mi ziangzat in an co timi le a bawm nak ruangah mipa, nunau tlawngkai in ziangzat in hnatuan an ngah timi cu kan thei theh. Himi pawl ruangah Fr.Ciceri cu a nungdam lai in Mithianghlim a si ka tinak a si” tiin PIME Puithiam in a sim.

           Mi pawl hrang ih thiltha a tuahnak le a nunnak a hlan nak pawl ah tuini ah Pathian hnen ka lung awi. A zangfah hnatuannak ah farah pawl a finkhawm ih Jesuh Khrist ah kom aw ringring dingah a bang dah lo” tiin Pierfrancesco in a sim.

           Paolo Ciceri cu 1942 November 25 ah Italy ram Milan ramthen Mante Siro ah a rak suak. A kum 12 ah Vatican khuapi ih Opera Don Folai Seminary ah a lut. Cuihnu kumthum ah Milan diocesan seminary ih lut dingah a rak pok suak. 1967, June 28 ah Milan Diocese ah Puithiam orination a rak ngah. 1971 ah Diocese ih kum 5 hna a tuan hnu ah missionary si dingah Pontifical Institute for Foreign Missions (PIME) ah a lut.

           1973 ah Bangladesh a thleng ih 2017 tiang cunah rian a tuan. 2005 laiin Fr. Ciceri cu natnak a phunphun a rak tuar ih lungnat pawl khal a tel. 2017 ah medical treatment tuah dingin Italy ah a feh. Culai ah Fr.Ciceri cu miharsa pawl community ah nunphung thangsonak hrang hna a tuan.

           Ram lei in cumi hmun ah Catholic mi pawl thlah in Khristian khua tampi a din. Inn le lo nei lo pawl hrang inn pawl a sak sak. Cumi khua ciar ah nauhak pawl fim zir nak ding hrang tlawng pawl a sak. Secondary tlawng a theh tu pawl hrangah cuhnakih a sang deuh mi tlawng khal a dil sak.

           Cui tlawng ih saya pakhat asimi Kathleen Biswa in “tuini ah Fr.Ciceri ih bomnak le a tha mi a lam hmuh nak ruangah saya tha ka si. Thla ka cam tinten a mah ka mang ringring ziangruangahtile Fr. Ciceri cu vancung mi vek ih a zum mi a si. Mi harsa tlawngta, bawmtu mi innsang, mina pawl siizung tha deuh ih kuatnak pawl in a bawm” tiin Biswas in a sim. Bangladesh mi pawl in amah upat nak le thil tha a tuah mi pawl thawn an mang. Himi thuthang cu RVA thuthang ihsin kan don mi a si.

https://bit.ly/3AqEKeP