Bangladesh ih Catholic Pawlpi in Our Lady of Lourdes puai tuah

bangladesh_in_our_lady_of_loudes_puai_tuah

Bangladesh ih Catholic Pawlpi in Our Lady of Lourdes puai tuah

          Kumtin tuah theu mi hminthang zet mi Marian puaini cu Feb 10 ah Bangladesh ih the Rajshahi Catholic Diocese ih Bonpara, ah Our Lady of Lourdes puai ni an rak hmang. Bishop Gervas Rozario in Puithiam 7, Sr. 15, le zumtu 2,000 luan pawl thawn Missa sumnak a rak tuah.

          Novena thlacamnak pawl, phayawngtaing  vannak, Thinglamtah lampi thlunnak, Rosary camnak, le hmailam caan Our Lady of Lourdes puaini ah lungawi thusim daan thawn Feb 1-9 tiang tui kum hrang thlarau lam timtuahnak an rak tuah. Feb 10, puaini hmuahnak ah mipi pawl in Rosary an rak cam ih Rajshahi Diocese ih Bishop Gervas Rozario ih hoha  mi Mass raithawinak ah ran rak tel.

          Thuthangtha a sim mi sungah, Bishop Gervas Rozario in, “hi puai ih ka tel ngah ruangah ka lungawi. Cule Vancungram ih kan Bawinu hnenih thlacamnak caanserh, hi khawmzawhnak ih kan tonawk thei hi a tha tuk,” tiah a rak sim. “Bawinu Maria cu Bawi Jesuih Nu a si. Asinan, Bawi Jesuh a mah rori in kan hnenah a Nu in rak pek. Curuangah zumnak thawn thla kan cam taktak le a mah zumnak thawngin Pathian hnenah kan thlacamnak pawl in dil sak ih cui kan thlacamnak cu Pathian in in pek,” tiah Bishop Rozario in a rak sim.

          Marian hngetkhoh zet ih zumtu, Lillian Costa in, “pulhnat caan ah Bawinu Maria hnen ihsin thluasuah tampi ka rak dongih, kan nunnak in rak run ih ka innsungsang pawl khal a rak humhim. Curuangah lungawi thu ka sim ih Bawinu Maria ka upatnak ka langter,” tiah a rak sim.

          Parish Puithiam, Fr. Dilip S. Costa in zumtu zate hnenah lungawi thu a rak sim ih innsang tin ah Rosary cam dingah khawmzawhnak ah a rak sawm. Ziangah tile Bawinu Maria cu kan nunram ih tihnungza phun zakip lak ihsin in humhim tu a si.Our Lady of Lourdes cu France ram, Lourdes Bawinu lungdawl ah 1858 ah kum 14 a si mi St. Bernadette Soubirous hnenah a hmuihmel ciing tu Mi thluasuah mi Bawinu ih hmin thianghlim a si thu a rak langter.

          Kan Bawinu in Bernadette hnenah natnak dam ter mi hlawnthil pawl tel mi tikua ihsin a kiangkap ih um mi leilung lai dingih lam a rak hmuh mi cu tui ni tiang a um lai. Lourdes Parish Bonpara ih Bawinu cu 1940 ah Rajshahi Diocese ah an rak din.

          Hi thuthang cu RVA thuthang ih kan ngah  mi a si.

https://bit.ly/3RYYM7Q

Add new comment

2 + 18 =