Bangladesh ih tlawngta pawl casiarnak tuah daan kel khaisang dingah tumtah in manpek tul lo mi Ca-uk puai tuah (February 22, 2022)

Bangladesh ih tlawngta pawl casiarnak tuah daan kel khaisang dingah tumtah in manpek tul lo mi Ca-uk puai tuah

(February 22, 2022)

          Bangladesh ram ih khuapi pakhat a si mi Rajshahi ih ram mipi pawl cu man lo in ca uk ngah thei dingah kumtin February 21 ih tuah theu mi ‘International Mothers Language Day’ (Leitlunhuap mai tong sunloih  ni) ah Circuit House lamzin ah an rak tongaw khawm. Tlawngta pawlkom in facebook  ih an hoha mi a si. Man lo ih ca uk ngah thei dingah a thlerthler in an rak hngak. Tu vekih man lo in ca uk zem thei dingah thlakhat hrawng thangphawk in ca uk hlun thawng za leng lo an rak dil. Mi pakhat in uk hnih a sang thei. Hi vekin tuahnak ih tumtahnak cu ca uk siar an duh zet nan hrekkhat cu sang dingah sumpai an hman thei lo ruangah ca an siar thei lo thu, tu vekih ca uk man lo ih peknak thawn nei zet mi ram pakhat din an duh thu an simfiang.

          Bangladesh tlawngta pawlkom ih tuanvo neitu Fr. Proshanto Anid khal in miphun dangdang, kum dangdang pawl in ca siar an paih lo. Tu vekih tuahnak thawn ca uk lei ih a siar thei lo tu pawl hrangah khal a remcan thu, veikhat sanah uk (2) san a theih thu, hi tiin phone pawl, TV, nuamnak pawl lawng ih caan hmang lo dingah khal a si thu, ram mipi pawl khal tui ca uk puai ihsin tampi an rak zir thu, hmailam caan ah khal tuah the ihram hai seh tiah a rak sim.

          Riahsiatnak Bawinu congregation sungtel Sr. Shibly Purification khal in ‘ca-uk pakhat cu rualpi pakhat’ vek ih hril dingah ruahnak a rak pek ih cui ca uk a siartu hnenah lam a hmuh ih hlei ah thluak ih tul mi khal a si thu, theihkauhnak khal a tam thu, nunram a tha zawng ih a hmuh ter thu, nunram ih tumtahnak khal a taktak ih tuah dingah a bawm thu a rak simfiang.

          Mino pakhat a si mi Kaniz Fatema khal in ca uk man lo ih san a theih ruangah a lungawi thu, siar theh zo mi ca uk khal thlengawk a theih thu, a mah khal ca uk pahnih a sangih pahnih a rak hlu thu a sim. Hi vekih tuah dingah rak thok tu cu casiar dingah tha a pek tu Bangla a si thu Joy Biswas in a simfiang.

          Hi puai timtuah tu ‘Aparna Reza’ khal in ram mipi pawl in ca uk duh in an siar duh. A mah dinhmun in ca uk thawn pehpar in pakhat khat tuah dingah ruahsannak a rak nei. Cui a saduhthah cu a rak famkim. Tu ahcun an tumtah mi vekin a kim zo ko nan a mah rori ih a siar duh thu a sim. Pa pakhat a si mi Gabriel Gomes in ca uk puai ah a fate thawn feh phah in a hmuh mi dinhmun ruangah hi ca uk puai cu hmailam ih tesinfa pawl hnenah technology lam lawngih caan hmannak ihsin a hruaisuak thei ding tiih ruahsannak a neih thu a rak sim.

https://bit.ly/3vmBKhL