Bawinu hnen Rosary thawn thlacam tlang dingah Pope Francis in a forh fial

Corona virus pulhnat caanah Catholic Kawhhran pi in Bawinu hnen Rosary thawn thlacam tlang dingah Pope Francis in a forh fial

          Pope Francis cu Vatican hmuan sungih Lourdes Bawinu Maria zuk hmaiah niruk sunah rosary thla a cam nak cu live in an thlah cih dingih, leitlun killi ih kawhhran mipi pawl khalin Pathian biak nak pawl, Bawinu Maria zuk hmaiah thlacam tlang ding ah a sawm. Leitlun killi ih kawhhran mipi pawl Pope Francis thawn rosary cam nak ih tumtah mi cu corona virus pulhnat caanah Bawinu Maria ih thlacam sak nak le a hnem nak dil dingah a si.

          Gospel thuthangtha cu tidaan thar ih sim nak thawn pehpar mi Pope zungpi ih chairman Archbishop Rino Fisiohella ih kuat mi ca vekih live thlah nak caan cu May thla ni (30) sun Rome tikcucaan zanlam nazi 5 le khuai (kawlram tikcucaan zinglam nazi 10) caan ah live in an thlah cih ding a si.

          Leitlun ih kawhhran mipi pawl in thlacam nak tiin hminsin mi a thianghlim mi hmunah harhdam nak lam ih hminsin mi daan pawl thawn kaih in, mai program in rosary camin, hmun khat ah thlacam dingah Rome khuapi ih tikcucaan vekin mah le ram ciar ah thlacam dingah kawhhran mipi pawl hnen a forhfial a si. Pope thawn hmunkhat ah rosary camin, thlacam nak ah a thok ihsin a cem tiang famkim ten tel thei dingah online ihsin khal siseh, Vatican ih tv program khal in siseh tel dingah theih ter nak thawn a forh fial a si.

          Corona virus pulhnat caanah Catholic zumtu pawlih thupi zet ih an ret mi a thianghlimmi thlacam nak hmun pawl kha phih a siih, France ram Lourdes khuapi ih Loudes Bawinu Maria zuk khal a tel ih, kawhhran mipi pawl thlacam thei dingah a hrekkhat hmun lawng May thla ni (16) sunah on sal a si.

          Cui tlunah Portugal Khuapi ih Fatima Bawinu hnen upat pek nak hmun pawl khal an khar a si. May thla ni (13) sun 1917 kum ihsin Fatima Bawinu a lang nak kum (103) kim thlacam nak cu Corona virus pulhnat ruangah san thuanthu ah mipi telloin a hmaisabik tuah nak a si. Tirhthlah 1:14 sungah "Hmun khat ih thlacam tlang dingah an tong khawm theu ih nunau pawl le Jesuh ih nu Mari le Jesuh ih nau le pawl tla an tel" timi ruat in Pope thawn rosary cam nak ah Gospel thuthangtha cu tidaan thar in sim rel nak thawn pehpar micu Pope zung pi pawlkom in an tuah.

          Corona virus pulh nat ruangah a thianghlim mi thlacam nak hmunpawl ih thla cam nak, khawm nak pawl an cawl a si. Cui hleiah khawm zawh pawl khal an cawl a si. Hitivek tikcucaan ah Pope cu kawhhran mi le fa pawl thawn hmun khat ih a um thu cu lang ter dingah a tum tiin Archbishop Fisichella in a sim. Gospel thuthangtha cu tidaan thar in sim nak thawn pehpar in Pope zungpi in 2017 kum ihsin thok in a thianghlim mi thlacam nak hmun pawl cu zum nak thangphok ter dingah tuanvo an lak a si.

          Leilung pumpi ah corona virus nat suan a tuar tu minung 5.4 tan (54,000,000) an um ih, nun nak a liam tu 340000 tlun a um thu CNA thuthang in kan thei a si.