Budapest ih tuah dingmi ramtin Bawi Jesuh THI le SA Puai ih ahleice thusim tu pawl lakah Cardinal Charles Bo le Cardinal Sarah pawl an tel. (April 21, 2021)

Budapest ih tuah dingmi ramtin Bawi Jesuh THI le SA Puai ih ahleice thusim tu pawl lakah Cardinal Charles Bo le Cardinal Sarah pawl an tel.

April 21, 2021

         Hungary ram ih khuapi Budapest ah September 5 ihsin 12 tiang tuah dingmi ramtin Bawi Jesuh THI le SA Puaipi ah Cardinal pawl le Bishop pawl 25 an tel ding ih cumi lakah Myanmar ram ihsin Cardinal Charles Maung Bo le Pathian biak khawmnak Liturgy thawn pehpar mi Pope zungpi council ih tuanvo nei tu Cardinal Robert Sarah pawl cu ahleice thusim tu pawl an si tiin CNA thuthang zung ihsin an sim.

         Bawi Jesuh Thi le Sa ah Bawi Jesuh a tak in a um ngaingai timi thu cu tuah ding mi himi ram tin Bawi Jesuh THI le SA Puaipi ah ram tin in tel ding a si thu a tlun ih puai ah leitlun ram then pi 5 ih Cardinal pawl in biakkhawm nak le a dang thu pawl asimi zinglam thlacam nak, Pathian thu, tettikhan nak tivek program pawl an hoha ding thu theih a si. A vei 52 nak Bawi Jesuh THI le SA Puaipi cu 2020 ah a ciah nan covid pulhnat ruangah tui kum 2021 ih an thawn mi a si. Cule,  himi Bawi Jesuh THI le SA Puaipi a cemnak Missa raithawinak ih telpi dingah Hungary ram pan dingin Pope Francis in timtuahnak a neih thu khal than a si.  

         Hungary ram cu Bawi Jesuh Thi le Sa Puaipi hrangah inn tek dinhmun in 1938 ah veikhat rak pom in an rak tuah zo. A liam zo  mi a vei 51 nak Bawi Jesuh Thi le Sa Puaipi cu Philippines ram Cebu khuapi ah an rak tuah ih, a vei 53 nak cu 2024 kum ah Ecuador ram ih tuah ding a si thu le Pope feh thei dingin ruahsan a si thu April 21 ah Ecuador ih ram danglam thawn pehpar mi upa in a twitter ah ngan in a lang ter. Himi thuthang cu CNA thuthang ihsin kan don mi a si.