Cambodia ih Catholic Pawlpi in Syria ih harsat tuartu Khrihfa pawl hrang bomnak pe (March 10, 2023)

Cambodia ih Catholic Pawlpi in Syria ih harsat tuartu Khrihfa pawl hrang bomnak pe (March 10, 2023)

Aid to the Church in Need pawlkompi in linghnin ruangih harsat tuartu Syria ih Khrihfa pawl hrang US dollar 25000 bomnak an peknak ruangah Cambodia ih bishop pawl hnenah capi thawn lungawinak an langter.

Himi lungawinak capi cu Phnom Penh ih Apostolic Vicar a simi Bishop Olivier Schmitthaeusler in March 8 ah a rak sang.

Aid to the Church in Need International pawlkompi ih Executive President tuanvo neitu Thomas Heine-Geldern cun, “Nan parish sungtel pawl hin ral buainak le vansiat malmaknak dangdang ih namnuainak a tong rero tu Syria ram ih unau pawl hrangah ti’n maihhrang lawng ruat lo’n siang zet in sumpai an rak thawhkhawm mi hi uar an um tuk,” tiah a ca ngan mi sungah a telh.

Hiti vek ih Christian duhdawtnak le harsat tuarpinak thawn lungrualnak an lang ter mi hin, beidonnak ih namnuai men lo nak dingah minung tampi ruahsannak a pe tengteng ko ding ti khal in a sim bet.

Capi an kuat mi sungah ‘bomnak an pek mi hi linghnin ruangah inn nei nawn lo mi Aleppo khua ih Christian innsang pawl hnenah pek a si dingih an inn pawl umnak a that hlan sung inn dang an sannak ding hrangah hman a si ding’ timi thu khal an telh cih.

Mirang ca ih nganmi capi kuat mi cu Khmer tong thawn an let ih sumpai a thawh tu pawl hnenah Bishop Olivier in a kuat. Cambodia ih bishop dang pahnih thawn Syria hrangah sumpai thawhnak in duhdawtnak a lang tertu zumtu Khrihfa pawl hnenah lungawi thu an sim thu khal Bishop Olivier cun a sim bet.

Syria ram hi 2921 ihsin ralbuainak a rak tong rero ih, magnitude 7.8 tha a cak mi linghnin in Aleppo khuapi cu tui kum February 6 ah a siatsuah lala. Himi linghnin in minung thawng tampi a that ih mi tampi inn nei lo ah a cang ter.

Hiti vekih Syria hrang bomnak pe thei dingah Cambodia ih bishop pawl in parish tinkim ah sumpai khawng dingin ca an rak kuat mi a si.

Himi thuthang cu RVA thuthang ihsin kan don mi a si.

https://bit.ly/3ZAwsvC