Cardinal Christian Wiyghan Tumi a kum 93 ah a nun nak a cem (April 6, 2021)

Cardinal Christian Wiyghan Tumi a kum 93 ah a nun nak a cem

April 6, 2021

          Cardinal Christian Wiyghan Tumi April 3, thianghlim zarhte ni ah a kum 93 ah a nunnak a cem. Amah cu Africa continent, Cameroon ram mi asiih, a ram ih remdaihnak hrangah beidong loin a zuam rero tu a si ruangah mi tampi ih theih mi Cardinal pakhat khal a si. Remdaih nak le minung pianvo hrangah khaisangnak a tuah ruangah 2019 ah "Nelson Mondela" laksawng pek a si.

          2020 kum ah hriamhrei keng pawlkom pakhat ih nazi tampi sung kaih a tuar. Cazirnak tlawng pawl ah tlawngta tampi ih nunnak a cemter mi tuahmawhnak a daih hnu, tlawngkai sal dingah nauhak pawl teimak suah in tha a pek ruangah cuih tuahmawh tu pawlkom ih thah ding tiang hringhro nak khal a tuar ringring. Ziangruangahtile hmailam santhar pawl an fim asile tuahmawh tu pawlkom pawl dinhmun in anmah pawl hmuhsuam a ngah lo ruangah fimthiam nak tha an pek lo. Himi misual pawl tuahmawh nak cu a that lo tuk ruangah Pope Francis amah rori in mawhthluknak a rak suahpi ve.

          A tha lo zet mi tuahmawh nak thawn pehpar in Pope Francis in "hi fihnungza thil thalo tuahmawknak hin ka thin i buai ter, ziangruangahtile hriamhrei keng lo, cangan nak fung a keng tu nauhak pawl cazir nak ih an um laiah zangfahnak zianghman nei lo in an kap. Hitivekih thil thalo tuahnak cu nei ta ah ziang tik caan hman ah cang lo dingah Pathian in kan thinlung ah ruahnak tha in pe hram seh. Cutivekih tuahmawh nak a tuar tu hmun khal remdaih nak a zamrang thei bik in ngah hram seh" tiin a sim.

          Cardinal Christian Wiyghan Tumi cu Pope Francis an hril lai ah me pe tu Cardinal pawl lakah pakhat a si. Pope Francis cu Cardinal ih thuanthu sung telh tlak thil a rak tuahmi pawl hrangah sunloih nak tong a tel mi himi ca cu Cameroon ram ah a kuat. Cardinal a nunnak a cem nak ruangah Nu Catholic Pawlpi ih Cardinal mipum 226 lawng an tang ih an mah lakah 126 lawng Pope hril nak ah me pek thei nak an nei. Phun dang in sim ding asile Cardinal 126 lawng kum 80 luan lo mi Cardinal pawl an si. Himi thuthang cu Rome Reports thuthang ihsin kan don mi a si.  

Photo courtesy of : Trendsmap

https://bit.ly/3g30ioi