Cardinal Parolin South Sudan a tlawnnak in ruahsannak in pe ding tiah Malakal Bishop in sim.

Cardinal Parolin South Sudan a tlawnnak in ruahsannak in pe ding tiah Malakal Bishop in sim.

          Bishop Stephen Nyodho Ador Maiwok in Sudan ralbuainak ihsin a tlan tu miharsa pawl thawn an rak tongaw ih Vatican Secretary of State a diocese a thlen ruangah a rak hmuak ih zianghman nei nawn lo mi mipi tampi hrangah leitlunhuap pawlkom hnenah zaangfah a rak dil.

          State Secretary, Cardinal Pietro Parolin ih Malakal, South Sudan khuapi a tlawnnak cu “kan hrangah a thupi tuk” tiin Malakal Diocese ih Bishop Nyodho Ador Maiwok ih sim vekin theih a si.

          Vatican thawn thusuhawknak pakhat ah, Bishop in Cardinal ih khualtlawnnak in ruahsannak a pek thu le duhdawtnak, naihniamnak, harsatnak a tuar tu pawl le Catholic Pawlpi ih lungrualnak a langter tiah a rak sim bet.

          Cardinal Parolin ih khualtlawnnak cu a bangaw lo mi pawlkom lakah lungrual ten tuan tlangnak thawn hmainor dingah, an rampi, an ramthen, le leiram pawl din dingah, thazaang tampi a um ding tiah a rak sim.

          Tlawngkai nihnih ni ihsin thok mi a umnak hmun, Vatican Secretary of State ih tlawnnak ah a mah le Diocese ih ruahsannak a si thu Nyodho in a rak sim.

          Tlawngkai nithum zing ah, Sudan ih cang rero mi ralbuainak in a luat mi miharsa pawl cu lawng thawn an thleng ih an thlennak centre ah netabik an feh tiang a rak umpi hai. Malakal khal tlawngkai nihnih ah Biakinn ah Mass raithawinak a rak tuah ih mikhual hmuahnak centre ah miharsa pawl thawn an rak tongaw.

          Miharsa 42,000 luan hrawng cu South Sudan saklam nisuahnak ih Malakal ah an rak thleng.

          Bishop Nyodho ih diocese ah, Nile parlam, Jonglei le Unity State tel in mipum 35,000 hrawng an ret sal ih a hleice in an sungkua pawl umnak ah an ret. Ngaingai ahcun miharsa tam sawn cu Khartoum ah kum rei nawn ih rak thawn tu thlanglam Sudan miphun pawl an si. An zaten, taankhat le hrek cu South Sudan ah an um ko nan, mi tampi cu ralbuainak ih luat thei dingah saklam ah an kir sal.

          Mipum 200,000 hrawng South Sudan ah an kir sal tiih ruah a si. An thlen tikah, an thilri zaten thawn a tui misual pawl in miharsa pawl an rak kai ngah zikte.

          Mi tampi cu ramri ah an thleng ih a hlan ah fangcang an kuat theu nan tu ahcun minung phurhnak ih hman mi Diocese ih thilri phurhnak lawng thawn Malakal ah an feh.

          Cu vekin, nihnih thum hrawng cu lawng thawn a tlawng tu mipum 400-800 hrawng an um. Cardinal Parolin cu cuvek long pawl thawn tlawngkai nithum ah a rak feh ve. Minung 3000 cu tu tiang ah cu vekin an kuat rero lai.

          Bishop Nyodho Ador Maiwok in Vatican News ih a sim mi ah nikhua siat ruangah le ralbuainak ruangih siatsuahnak pawl harsa zet in Diocese in a tong tiah a rak sim. Tu ahcun, Sudan ah ralbuainak ruangih a tlan tu thawng zaleng lo an cohlang rero ih a tum zet mi hniksaknak pawl khal a tam deuhdeuh.

          A cemnetnak ah, Bishop Nyodho in rualpi pawl le mipi pawl bawm dingah leitlunhuap pawlkom hnenah zaangfah a rak dil. Ziangah tile, “tui dinhmun cu nunkhuasaknak din sal dingah bawmnak a tul tuk ruangah milai le milai lainatnak thawn kan tul awk ruangah a si” tiah a rak sim.

          Hi thuthang cu Vatican News ih kan ngah mi a si.