Cardinal thar tuanvo pek nak caanserh Vatican in a nepnawi in sim nak. November 23, 2020

Cardinal thar tuanvo pek nak caanserh Vatican in a nepnawi in  sim nak.

November 23, 2020

          Pope Francis in a rak than vek in Cardinal thar 13 tuanvo pek nak puai cu 2020, November 28, Zarhte ni zaanlam nazi pali ah an tuah ding thu, Pope thawn pehpar mi the Holy See Press zungih director Matteo Bruni in a nemhnget thu a rak sim.

          Cui caanserh ah Brunei ram ih Pope ai-awh tu Bishop Cornelius Sim le Philippines ram ih Capiz Archbishop Jose F. Advincula pawl cu tu-ih a cang rero mi pulhnat dinhmun vek a si le an tel thei lo ding thu, Pope ai-awh tu pakhat ih lukhuh, zunghruk le ap nak ca pawl aiawh tu Cardinal hnen ap a si ding thu a rak sim.

          Vatican ih thusim thei nak a nei tu in "dinhmun a phunphun ruangah Rome khuapi a ra thei lo tu pawl in digital thiam nak thawn Vatican Basilica thawn pehtlaih in a hla vaang in tel a si ding," tiah a rak sim.

Programme pawl cu a thuai lam vek in a si.

          November 28, Zarhte ni, zaanlam nazi pali ah Pope Francis in Vatican Basilica ah Cardinal thar tuanvo pek nak Missa raithawinak tuah a si dingih, Cardinal thar pawl cu zunghruk le tuanvo ap nak caanserh thawn ap ding a si. Covid-19 pulhnat dinhmun pawl ruangah an tuah kel vek cun si lo in caanserh ih a tel tu ding Bishop pawl, Puithiam pawl, thukam pathum a la tu Sr. pawl le kohhranpi pawl mipum laiteek a si ding thu, Cardinal thar pawl thawn a tel tu ding pawl hrang lawngah Pope zungih lethmat pawl suah sak a si ding thu a rak sim.

          Programme tuah caan ah Pope ih to nak cu Missa tuah nak pulpit hmai ah ret a si dingih, Cardinal thar pawl cu Missa tuah nak pulpit kiang khat le khat ah, Pope Francis ih vorhlam le kehlam ah to nak an pek ding. Kohhranpi 100 hrawng cu Missa raithawinak ih a tel tu ding Cardinal hlun pawl ih dunglam ah an to ding. Pope Francis in Cardinal thar pawl a ap nak Biakinn pawl ih Parish Puithiam pawl le tlawng uk tu Puithiam pawl khal caanserh ah an tel ding a si.

          Cardinal thar pawl cu an mai secretary pawl tel in Programme tuanvo nei tu thawn St. Joseph Biakinn kiangin a sangsang in an lut ding a si. Caanserh thok nak ah Cardinal Mario Grech in Pope Francis cu hmaisa ah cibai a buuk ding. Zunghruk ap nak le tuanvo ap nak cohlang dingah Cardinal thar pawl cu Pope ih hmai thleng dingah pulpit zoh phah in keh lam in vorhlam ah an feh ding.

          Ap nak tuah daan pawl an sim hnu ah Cardinal thar pawl cu an um nak hmun pawl ah an feh sal ding. Remdaihnak hminsinnak ah khat le khat cibai buuk nak ah an pom aw ding. Caanserh theh ah Pope Francis in Cardinal thar pawl, an mai secretary pawl thawn St. Joseph Biakinn lam in sacristy khaan ah an tlung ding.

          November 29, Zarhpi ni, zinglam nazi pahra ah Pope Francis in Vatican Basilica ah Cardinal thar pawl thawn Missa sumnak a tuah ding. Hi thuthang cu Zenit thuthang ih kan ngah mi a si.

https://bit.ly/2V3tyzL

Archive image of Consistory