Catholic thuthang la tu pawl kilkhawitu Mithianghlim thar pakhat thang. (May 12, 2022)

Catholic thuthang la tu pawl kilkhawitu Mithianghlim thar pakhat thang.

(May 12, 2022)

            May 15 ah leitlun killi ih Catholic thuthangla tu pawl cu a dang thuthang la tu pakhat cu Mithianghlim cazin ah an bet. Cui ni ah Dutch miphun Carmelite pawlkom pakhat asimi Titus Brandsma cu Mithianghlim tiin an khaisang ding. Amah cu 1942 ah ralbuainak ah thah a tuar. Tuilai internet pawl, social media pawl a thanso caan ah Catholic hmuh nak in thuthangla tu asinak ah kum zabi a dotdot ih a um mi hmuh niam nak, miphun thinlung le dokalhnak tuar tu pawl an si tiah a hmu. Thinharnak lak ihsin ralthatnak thawn mai hnatuan rak tuan tu, tui Mithianghlim kaisan ding mi nunram cu ruah ding tlak zet a si.

            Amah cu 1881 Netherland ah Catholic nupa hnen in a rak suak. An kiangkap ah protestant pawl an tha a cak zet. A kum 17 ah amah cu Carmelite Pathian riantuan tu si dingah tumtah in Boxmeer ih thuzirnak ah a lut. Pathian riantuan tu asi tikah a hmin cu titus tiin thleng a si. Dungthluntu pawl ih fa a si tu cu Kohhran ih ahmaisa bik thuthang latu pakhat a si.

            Mithianghlim ih khaisan ding mi kumkhua Puithiam sinak cu (June 7,1905) ah a lak. Cuihnu Rome ah fim a zir ih 1909 ah Gregorian phunsangtlawng ah thiamsang buaih a ngah. Cuihnu "Netherland" ah a feh. Cui Kohhran ah a thilti nak nasa zet in a lang ter thei. Kum 5 luan hrawng Catholic ca ngan tu tiin Catholic ca pawl a ngan. A zirh. El awk nak pawl a sim fiang. Carmelite pawlkom Avila khuapi ih St.Theresa ruahnak, ca pawl cu a mai tong thawn a ngan. 1919 ah tlawng pakhat a phuan ih kum hnih hrawng ca a zirh thei. Amah cu zuk pawl thawn Bawi Jesuh ih harsat nak pawl a ngan. 1923 a thlen tikah Nijmegen Catholic phunsangtlawng phuan nak ah a tel ve. Cui phunsangtlawng ah a mah cu philosophy le theology zung pawl ah hna a tuan. Cumi san ah professor pawl an rak sia zet nan anih cu tlangta pawl thawn nel aw zet in a um. Nel ol dingin a um.

            Himi fimzirnak hnatuan pawl karlak ah Fr.Titus Brandsma cu Catholic thuthang a rak din thei. Amah cu 1935 ah a ram ih Catholic thuthanglatu pawlkom ih thlarau lam lam hmuhtu Puithiam tiin tuanvo a nei. Amah cu nazi daan le socialist daan thapek nak pawl darh lo dignah, Jew pawl huat nak nasazet in a dodal. Catholic pawlpi ih huatnak thawn pehpar in zirhnak le thuthang ca ih zalen nak dungsip lo ih donak in harsat nak a thleng ter.

            Holland German ih an neh nak 1940 ah Fr.Titus Brandsma cu a ram ih Bishop pawl hnen nazi le an siatsuah mi minung covo pawl, Dutch Jew pawl hmuhsuam nak pawl um san men lo dingah a forhfial. Himi tuah nak ruangah nazi pawl a ti duh mi ah a cang. Dutch Bishop pawl ih Catholic editor pawl hnen ah nazi pawl tuah mi thuthang daan pawl dokalhnak cu a thup ten a darh lai ah (Jan 19, 1942) ah kaih a tuar. Amah cu chau ih an hruai hlan ah thawng inn hmun 3 ah thawn in thawng an thlak.

            Amah cu Chau ih thawng an thlak nak dinhmun cu a besia zet. Kum 61 asi zo mi kumupa carmelite Puithiam ih harhdamnak cu rin lopi ah a tla sia. Cutiin July 1942 ah chau hmun ih siizugn ah an kuat. Amah cu nazi pawl an suah mi siivai pawl ih check a si hnu (July 26,1942) ah tur ti dawt nak in an that. Amah thah a tuar ding ti a thei ih thla a cam. A thlacam nak cu nurse ih thinlung a thleng ter. Father cu carmelite rosary kha nurse hnen a pek. Sayamah in a thok ah a el. Ziangruangahtile amah cu Catholic asinan biaknak lam ah tuah ding mi pawl tuah loin nazi pawl ih daan a thlun ruangah a si. Cui thawngtla pawl hnen siidawt ih a that tu nurse cu netaah carmelite kaing ah feh in sualsir nak thawn ngaithiam a dil. (November 1985) ah Fr.Titus ih Mithianghlim khaisannak hrang chau hmun ih dinhmun pawl thawn pehpar in a theih tawk in thu a la. Himi thuthang cu RVA thuthang ihsin kan don mi a si.

https://bit.ly/3wxQIkh