India Catholic Bishop Pawlkom (CBCI) in Jesuit Siangbawi, Fr. Stan Swamy kaih a tuar le thawnginn sungih khum a tuar mi duhlonak an lang ter.

October 15, 2020

Fr. Stan Swamy cu October 8 ni ah India ram nisuahnak lam Jharkhand State ih khualipi a simi Ranchi ah National Investigation Agency timi thu-zingzoitu sungtel pawl in an kai.

Tui tum ih kum 83 a si zo mi Fr. Stan Swamy an kaihnak san cu Maoist raltho pawl thawn pehtlaihnak a nei ti ih zumhlelnak ruangah le 2018 kum lai ih Bhima Koregaon thubuai ti ih rak laar zet mi miphun thu ih buainak thawn khal pehparnak a nei ti zum ruangih an kaih mi a si.

Fr. Stan Swamy cun himi a par ih mawhphurhnak an neih mi hi thuphan hlir a si ti’n a el. An kaihnak hmun cu Jesuit Siangbawi pawl ih Bagaicha innpi a si ih cutawk ihsin Mumbai khuapi ih thuthennak zungpi ah October 23 ni ih thuthennak tuah sak dingin an hruai ih Taloja thawnginn ah an khum laifang a si.

Himi thu ah India Catholic Bishop Pawlkom ih tuanvo neitu Archbishop Felix Machado cun, “Fr. Stan Swamy vek kum 80 le 90 karlak mi derthawm pakhat in tuitum pulhnat ruangih mi harhdam pawl hman khual an tlawn ngam lo caan ah hiti vek harsatnak lak ih caan an hman ding cu ziang vek dinhmun tiang an thleng thei ding ti hi ruah har zet pakhat a si” ti’n a sim.

Tuitum thil cangmi ah, Jharkhand State ih Chieg Minister (Vuancichuk) Hemant Soren in Fr. Stan Swamy an kaih mi a duhlo thu le India ram ah mipi lam auaw zianghman ngaihsak lo in namthlak a si theu thu khal a sim.

Mipi hrang cangvai rero ve tu Harsh Mander khal in, Maoist raltho pawl thawn pehtlaihnak a nei timi mawhphurhnak thawn Fr. Stan Swamy an kaihnak parah “Hihi hnihsuak za thil pakhat a si ko. Fr. Stan Swamy hi a cozah in khuate minung pawl ziang siar lo in setzung tumpipi an thohsuah rero mi parah duhlonak a langter ruangih kaih a tuar mi men a si” ti’n a sim.

Christian Solidarity Worldwide Pawlkom dintu Mervyn Thomas khal cun, kannih pawlkom sungtel pawl khal in India ram upa pawl hin Fr. Stan Swamy thuhla thawn pehpar in ziangti vek in thu-zingzoinak an tuah timi le khuate minung pawl ih covo hrangih auaw a suahpi rero tu Siangbawi pakhat ih thuhla thensak dingih an kul a fungmi thu ah kan don a rak har ve ti’n a sim ve.

Cuihleiah, India ram ah hin thudik thuhman le dingnak hrangih auaw a suahpi tu pawl hremnak an ton rero khal kan hmu. A cozah in himi thu hi a lungkim pi a si lo ahcun tha teih tawlrel sak dingah tuanvo a neih thu khal a sim bet.

India ram sungih mipi hrang cangvaitu pawl siseh, thuthang latu pawl siseh, daan kilhim duhtu pawl siseh, mipi lak ihsin mihrek khat pawl siseh, an zate kom in mipum 2000 zikte in Fr. Stan Swamy kaih a tuarmi an duhlonak thu an tarlang. Hi pawl hmuahhmuah in tui tum pulhnat a karh caan ih kum 83 kim zomi Siangbawi pakhat kaih a tuar mi hi thil rapthlak le phuhlam theih thil pakhat a si ti’n an zate lungkim in thu an suah.

Source: RVA News

https://bit.ly/2T2XzyI