Covid-19 nat a tuar rero tu Cardinal Burke hrangah thlacam sak cio uh si (August 18, 2021)

Covid-19 nat a tuar rero tu Cardinal Burke hrangah thlacam sak cio uh si

August 18, 2021

          Ruah lo mi thuthang pakhat cu kum 73 a kim zo mi Cardinal Burke cu covid nat suan a tuar ih tuamhlawmnak a lak rero lai thu, a natnak cu tlaphang zet dinhmun a si.

          A mah cu Malta ram mi a si ih August 14 ah siizung a um thu, cu mi hlan nithum hrawngah covid nat an rinhleh ruangah cekawknak a rak tuah thu a Twitter ah a rak tarlang.

          August 17 ni ah a cuap in hna tha ten a tuan nawn lo thu a rak sim. Cardinal cu Bawinu Maria rinsan zet tu a si. Curuangah khal leitlunhuap pi ih Catholic kohhran mipi pawl khal in Cardinal zamrang ten damnak a ngah sal thei nak dingah Rosary camnak thawn thla an cam sak rero.

          Cardinal dinhmun in covid humhimnak sii a dawh le dawh lo cu a fiang hrih lo. Hrekkhat thuthang cahmai ah cun a mah cu covid siidawhnak dodal tu, zumnak nei lo tu tiin an tarlang. A mah dinhmun in a dodalnak cu hi covid humhimnak sii tuahnak hrangah thlak a tuar mi naute pawl ih cell a tuah sal ruangah cin le daan thawn a kaih lo tiah a sim.

          Asinain, Vatican dinhmun in cin le daan thawn a kaih lo mi humhimnak sii si lo in cin le daan thawn a kaih mi sii lawng hmang dingah a forhfial.

Asinain, innsang pakhat dinhmun in mai innsungsang pawl hi pulhnat sia suannak in humhim aw dingah tumtah in a par lam ih sim zo vek in nauthlak mi naute pawl ih cell thawn tuah hman sehla sii dawh a si le siidawt tu a sual lo. A suah tu pawl le an hntuan pi pawl ih sual a si tiah a tarlang.

          Cardinal Raymond Burke cu Wisconsin khuapi LaCrosse khua ah a rak suak. A kum 26 ah kumkhua Puithiam sinak a rak lak. Cui hnu ah 1994 in 2003 tiang Bishop dinhmun in rian a rak tuan ih 2008 ah Rome ah kawhnak a rak ngah ih Vatican zungpi ih Apostolic Signatura zungih tuanvo neitu in rian a rak tuan.

          2014 ah cun Pope Francis in Malta (Order of Malta) kilkhawi tu ah tuanvo thar a rak ap bet. Apostolic Signatura zung cu Nu Pawlpi ih a sangbik mi zungpi a si.

A mai kilkhawi mi (Order of Malta) cu kohhranpi mi menmen pawl thawn din mi Biaknak lam pawlkom a si ih milai khat le khat zawhruah mi bawmnak pawl, harhdamnak le nunphung lam bawmnak a tul tu pawl kilkhawi tu pawlkom a si.

          Cardinal cu covid nathrik suan a tuar tu Biaknak lam hotu malte pawl sungin pakhat a si ve. A mah hlan ih nat a rak ngah tu cu mi theih tam zet mi Manila Archdiocese ih Cardinal Luis Tagle a si.

          Tu ah cun Cardinal cu a dam sal zo ih a mai hna a tuan rero. A mai nat a tuar lai ih a sim mi thuthangtha cu ‘Kan nih cu thatnak tuah dingah ni le sun thawn hlah uh’ ti a si.

          Ziangah tile thihnak in ziangtik ah in hruai ding ti kan thei lo. Nat tuar caan ah thatnak zianghman kan tuah thei lo. Ihnak par lawngah kan it men ti a si. Tui ni netabik ih ngah mi thuthang vek a si le nazi 48  sung nai ten kilkhawi tul mi dinhmun a si thu Cardinal kiangih a um tu pakhat in a rak sim.

          Hi thuthang cu Aleteia thuthang ih kan ngah mi a si.

https://rb.gy/drix6k