Covid-19 theh hnu Pope Francis in hmaisabik a tuukhaal khual tlawng nak ding February 8, 2021

Covid-19 theh hnu Pope Francis in hmaisabik a tuukhaal khual tlawng nak ding

February 8, 2021

         Pope Francis cu covid ruangah khawmzawhtu pawl thawn tlawngkai nithum ni tinte le Zarhpi ni tin ten live thlah ih tonawknak caanserh a cawlh nak hi thla reipi a si thlang.

         Cu vekin nunphung, ramkhel, Biaknak lam hotu pawl thawn tonawknak, ramsung, ramleng a tuukhaal khualtlawnnak khal a rak cawl.

         Hi a rak cawlh mi programme cu (2021, March 5) ni ah a thok sal ding a si. Covid theh hnu ih ramleng ih khual a tlawnnak ding ram cu Iraq ram a si.

         Rome khuapi in (March 5) ni in a feh dingih Iraq ram ih ram tinkim thawn pehpar mi Airport ah sun ah a thleng ding a si. Cui hnu ah ram thu nei tu pawl in President inn ah rampi caanserh in an hmuak dingih President thawn khal an tong aw ding.

         President thawn an tongawk theh ah cui hmun ih thuneitu pawl, ram pehtlaih tu pawl, Puithiam pawl, Sister pawl thawn khal an tongaw ding.

Cu vek in Bishop pawl, Brother pawl le Pathian thu sim tu saya/sayama pawl le Iraq khualipi Baghdad khuapi ih um Syria Catholic Biakinnpi a si mi Rundamtu Bawinu Biakinn ah an tongaw ding a si. Cui hnu ah Missa sumnak cu Baghdad ah an tuah ding.

         March 6, Zarhte ni ah khuapi in Najaf ah a feh dingih a ropi zet mi Ayatollah Sayyid Ali Al-Husayi Al-Sistani ah khal a feh ding. Cui hnu ah Nassirya khuapi, Ur tlangrawn ih tuah ding mi Biaknak khat le khat thu rel tlang nak ah a feh ding a si.

         Zaanlam ah cui hmun ah a feh sal dingih khuapi ih um Syria daan a hmang mi St. Jude Biakinnpi ah Missa raithawinak a tuah ding.

         March 7, Zarhpi ni ah cun Erbil khuapi ah a feh dingih Biaknak lam hotu pawl, mipi lam ih thuneitu pawl in an rak hmuak ding a si.

 Cui hnu ah helicopter thawn Mosul ah a zam dingih cui hmun a thlen hnu ah Hosh al-Bieaa ah ralbuainak ih a sungtu pawl hrangah caan rei lo te sung thla a cam sak ding.

Cui hnu ah helicopter thawn Qaraqosh ah a feh dingih cui khuapi ih um Christian pawl thawn Sual hram nei lo in a seem mi Bawinu’i Biakinn ah an tongawk ding.

Cui ni sun hnu ah Pope cu Erbil khuapi ah a feh sal dingih ‘Franso Hariri’ leh nak zungah Missa sumnak a tuah ding.

Missa raithawinak thehah Iraq khua ah a feh dingih tlawngkai nikhat ni, zinglam thlah nak puai theh ah Pope ih nili a rei mi, Covid theh hnu a Tuukhaal khualtlawnnak cu Rome ah a kir sal ding thu cu Vatican thuthang in kan dong a si.

https://bit.ly/2MVLOL8