Deepavali (Devuali) hrang Vatican ih cibai buk nak ca

Deepavali (Devuali) hrang Vatican ih cibai buk nak ca (Oct 20, 2022)

Duhdawt zet mi Hindu rual le pi pawl,

            Vatican zung ih zumnak a bang aw lomi biaknak khat le khat thurelnak ihsin October 24 ih hman asimi Deepavali  ( Devuali) ni sunglawi hrang cibai buknak an kuat thu, theunak ih puai caan ah thluasuah le lungawinak tleunak si hram seh.

            Nan kiang ih innsang sung pawl, pawlkom le nunphung kiangkap khal ah tleu hram seh. A tui a cang rero mi buai nak pawl, harsat nak, leitlun hmun tampi ih a cang mi, biaknak, nunphung, miphun, tong thuhla pawl parah bun aw in a cang rero mi tuahmawhnak zaten zuamawknak ramkhel lam ruahnak, ram khel lam ruahnak thar thang nak, miphun upa, miphun te naupawl, media pawl dik loih hmannak cu ahleice thuhla a si. Himi dinhmun zaten cu ulenau tiin umnak, remdai ten umtlang nak dinhmun pawl a siat ter. Curuangah khat le khat um tlang thei nak cu zate tuanvo a si. Tuanvo laknak theihnak nung dingah khaisang ding. A nuam mi kan daan pawl khal kilkhawi vivo ding. Cuihleiah kanmah pawl cu nanmah thawn Khristian le Hindu pawl hmun khat ten kom aw in tuanvo la, tuanvo nehnak thawn thiltha tuah a theih.

            Hmun khatten umnak cu nelawknak, nunnak a bang aw lomi karlak ah midang pawl thawn um thei nak, a bang aw lonan upatnak, duhdawtnak, zumnak ngah ding. Cutivekih um thiam nak cu nelawknak, ulenau thinlung neihnak, khat le khat rualrem ten, mi khat le khat zangfahnak nei in din nak a si. Hivek ih tuah thei nak cu thil thiam nak a si. Cuvekin um thiam dingah thinsau nak nitin nunnak, biakawknak, khat le khat thu ngainak, zirnak pawl parah a bun aw.

            Nunnak cu thi luannak, komnak ulenau nunnak ah a bun aw. (Pope Francis, Encyclical letter fratelli Tutti, on fraternity and social friendship, 2020, no.87)

            Hmunkhat ten um khawmnak tthan dingah pawlkom khat le khat tha peknak siseh, tuah nak khal ralring thiam ding a tul. Hivek ih tuahnak mi hlawk nak hrang ulenau duhdawtnak, hmunkhat ih tuanvo laknak, feh tlang dingah man a um thu a lang ter. Mi hlawknak hrang kan ti thei mi pawl tuan nak hleiah kan kiangkap khal ah hmun khat ten an tuan nak khal upat ding. Curuangah nunphung thatnak le kum reipi daih mi thansonak, mi tinkim siseh,kiangkap siseh duhdawt nak thawn nung thei dingah zuam ding.

            Hmunkhat ten um nak ah buainak tampi ton asi ding. Ziangruangahtile a tam sawn in hivek ih umnak ih zuamnak cu anmah thawn sai lo, duh lo vek in an um ding. Asinan Pathian zumtu kannih cu an ruahnak ah um ve lo ding a tul. Hnget zet in lam hmuh ding. Innsang ah nupa, kum upa pawl cu an tuu le fa pawl parahthu an nei tuk. Cutiin hmunkhatten umnak khal ah a bang aw mituanvo lak ding.

            Innsang biaknak lam hotu pawl, leitlun killi ih biaknak pawlkom pawl zaten fimzirh tu pawl, nunphung a phunphun, cozah pawlkompawl, cozah silomi pawlkom pawl khal himi hmunkhat ten umnak nunphung tamter dingah tuanvo lak ding. Himi tuahnak phun ziangvak tidaan khal siseh hman ding.

            Pope Francis in thupi ih a simmi zumnak bang lomi biaknak a phunphun thurel tlang nak cu kan tikcu caan hrang ruahnak nei ih tuahnak a si. Ulenau thinlung thang ter tu thu, leilungpi remdaihnak dinnak a si. (Greeting to the Delagates of the Internationnal Jewish Committee on Interresligious consultations, 30 June, 2022) himi forhfialnak asiih, a cang thei miforhfial nak khal a si. cuvekin zumnak a banglomi zaten hrang khal hi man a nei zet mi ulenau thinlung nung ter dingah, lungrualnak, hmunkhat ten tuar tlangnak pawl cu mi tampi mi thatnak hrang tuan dingah forhfial nak khal a si.

            Kannih biaknak lam pawlkom pawl ih zumtu pawl le hotu asimi Christian pawl, Hindu pawl a dang biaknak zumtu pawl, thinlung tha nei pawl zaten kutkai aw in biak nak lam zumnak, ruahnak pawk ah hrambun in minung pawl thatnak le kan leilungpi thatnak hrang hmunkhat ten umnak tuan phah in leilungpi cu zate hrang remdaihnak, lungawinak ah um in a him mi inn tiin thleng dingah zuam cio uh.

            A nuam mi Deepavali si hramseh tiin thla cam phah in.

https://bit.ly/3NxvScV