Egypt ram ih Coptic Orthodox Biakinn kangah a malbik minung 41 thi. (August 17, 20220)

Egypt ram ih Coptic Orthodox Biakinn kangah a malbik minung 41 thi.

(August 17, 20220)

          Egypt ram, Giza khuapi ih um Coptic Abu Sefein Biakinn cu, zarhpi zing nazi 9:00 am hrawngah a rak kang ih mipi 41 an thih thu theih a si. Cu pawl sungah 18 cu nauhak an si ih kum 3-16 karlak an si.  Egypt harhdamnak lam ih tuanvo neitu pawl hnen in a malbik mipi 41 an thi ih 14 in hriamhma an ngah thu theih a si. Coptic Biakinn ih sim rel theinak neitu, Archpriest Moussa Ibrahim in “a thi tu lak ah Orthodox puithiam pakhat tla a tel” tiah CNN ah a rak sim. Acozah lam ih tuanvo neitu prosecutor-general Hamada El Sawy ih sim mi sirhsan in Ahram online thuthang zung in “tayacuai theinak pawlkom in a thitu pawl ih ruak zaten an rak cek fel ih mithi pawl ih ruak pawl ah langhngan mi hriamhma pawl an hmuh lo thu,” an tarlang.

          Meisa a kang lai ah Giza ih um Abu Sefein Biakinn ah mipi 5000 hrawng Zarhpi ni ah an rak khawm. Meisa kang cu thli ngahnak cet (air condition) in electric lam a pehnak ih sin Biakinn dothnihnak in a rak kang thok. Mesia kang awn ringpi an theih hnu ah Biakinn dothnihnak a rak kang rero zo. Biakthawinak tuahtu pawl cu Biakinn sungah an um ih Biakinn sungin zamrang ten an pot. Meisa kang cu saangkapi ih a kang rero ruangah mipi pawl potnak a kham. “Mipi pawl cu dotthumnak le dotlinak ah an fin aw khawm ih dothnihnak ihsin meisa khu an hmu. Mipi pawl cu kaililawn in an tum ih an pah aw cupco” tiah biakthawinak ih tel tu Yasir Munir in Reuters thuthang ah a rak sim.

          Munir in a mah le a fanu cu thuaita khaan ih kan rak um ruangah kan luat thei tiah a rak sim bet. Egypt President Abdel Fattah al-Sisi in a thi tu pawl ih sungkua pawl hnenah a riahsiat thu a rak sim ih biakinn sak sal dingah hriamhrei kaitu ralkap, Engineer thuneitu hnenih a sim zo thu BBC thuthang ah a tarlang. Coptic Christian pawl cu Egypt mipum taan 103 lakah a malbik taan 10 an um. Giza cu Egypt ram, Nile tivapi kiangah a um.

          Hi thuthang cu RVA thuthang ih kan ngah mi a si.

https://bit.ly/3JZ4fr8