Falam, Christ the King Catholic Biakinn ah April 18 ihsin May 29 tiang MCA nauhak pawl thaal sung thuzirnak tluang te’n theh. (May 29, 2022)

Falam, Christ the King Catholic Biakinn ah April 18 ihsin May 29 tiang MCA nauhak pawl thaal sung thuzirnak tluang te’n theh.

May 29, 2022

Covid-19 pulhnat ruangah le ram buainak ruangah kan fale pawl kum 2 sung rori tlawngkai thei loih an um hnu ah April 18 – May 29 tiang, Falam, Christ the King Catholic Biakinnpi ah MCA (Missionary Childhood Association) nauhak pawl hrangih tuahsak mi Pathianthu le thil dangdang zirnak cu Pathian ih lam hruainak le umpinak thawngin tluang te’n thehsuak a si zo. 

Himi MCA nauhak pawl thaal sung thuzirnak ah mipum 138 an kai thei. Nauhak pawl cu an kum ih zir in hmun 4 ah then an si zirhtu Saya 14 ih zirh an si.

Zirhtu Saya pawl in a hnuailam vekin tuanvo an lak:

1. Rev. Fr. David Kap Cin Mang – Catechism

2. Sr. Anny Sui Nei Zing – English (Phonics)

3. Sr. Cecilia Maung Cha – Catechism

4. Cate. Saya Cletus Hrom Lian – Solfa

5. Cate. Saya Noel Tluang Bawi – Catechism

6. Sayamakyi Tuang Sui – Laica

7. Saya Lian Tiam – Music/Solfa

8. Saya Van Hel Thang – Personal Development

9. Saya Augustine Van Biak – English (Grammar)

10. Sayama Ngun Hlei Tling - Laica

11. Saya Simon – English

12. Saya Jeminas – English 

13. Sayama Susanna – English 

14. Sayama Sui Hlei Hniang – English 

Thuzirnak cu tlawngkai nikhat ihsin tlawngkai ninga tiang, zinglam nazi 9:00 ihsin zanlam nazi 3:00 tiang, zinglam ah caan 3, zanlam ah caan 2 ti’n tuah a si. 

Culawng siloin, nauhak pawl lakah teamwork spirit timi hnatuan tlang thiamnak thinlung a karh sinsin ding tumtahnak thawn Zarhte ni ah Sports Day an tuah ih team 4 ah then tahrat in lehpannak le hnatuan tlangnak khal an nei a si. 

Himi thuzirnak caanserh cu May 29, Zarhpi ni, Bawipa Jesuh Vancung Kai Puai ni ah Missa Sumnak le Closing Ceremony thawn sunglawi zet in net ter a si. 

Missa Sumnak sungah nauhak mipum 35 in First Communion an ngah. Cule Missa Sumnak theh vete’n rawl ei tlangnak thawn Closing Ceremony tuah cih a si. Cumi Ceremony sungah Falam Parish hotu Rev. Fr. Francis Lan Sawn in thucahnak tawite a nei ih, MCA nauhak pawl hotu Sr. Cecilia Maung Cha khal in lungawithu simnak le thuzirnak cangsuak daan thawn pehpar in simfiangnak tawite a nei ve. Cun MCA nauhak thuzirnak Exam (Camibuai) result suakmi ih zir in, thiam hleice pawl hrangah thiam-man laksawng le zohthim tlak pawl hrangah fel-man laksawng peknak khal a um. Cuihleiah, zirhtu saya pawl hnen lungawi-laksawng peknak, Kawhhran mipi ai-awh in Chairman Pu Michael Za Siah Luai ih lungawi thusimnak, nauhak pawl ai-awh in nauhak pakhat ih lungawi thu simnak, nauhak pawl ih hlasak le lamnak a phunphun thawn caan hman a si.

Kum 2 sung rori tlawng kai thei lo dinhmun a si vekin, tui tum ih tuahmi thuzirnak cu a sunglawi, a thahnem hleice. Fimthiamnak lam ih an thangso lawng silo in, veng dangdang ih ummi kan nauhak tete pawl in nel-awk nak caantha an ngah ruangah social lam khal ah tampi an thangso bet a si.  

Himi thuzirnak ah World Vision Organization lam khal in, cazir nak hrangih tulsam mi ca-uk pawl in bawm ve a si. Tu vekin thaal sung thuzirnak cangsuak thei dingin a tawlreltu upa pawl siseh, sumpai, thazang, thlacamnak thawn tan in lakpi tu nan zate parah lungawinak kan lo hlan a si. 

Kan nauhak pawl khal Pathian mithmai ngahtu le minung ih rinsan tlak dinhmun ih an thangso vivo nak ding hrang thlacamnak thawn tui tum ih thuthang thannak cu hi zat in kan bang hrih ding.

A rak ngaitu nan zate’n Pathian in lo thluahsuah cio hram seh…..