Filipino Cardinal in thudik, dingfelnak, le remdaihnak hrang cangvaihnak tuah dingah Black Nazarene puaini ah forh.

Filipino Cardinal in thudik, dingfelnak, le remdaihnak hrang cangvaihnak tuah dingah Black Nazarene puaini ah forh.

          Manila Archdiocese ih Cardinal Jose F. Advincula in Catholic mipi pawl hnenah thudik, dingfelnak le remdaihnak hrangih cangvaihnak tuah dingah Jan 09, Black Nazarene puaini, Missa Sumnak ah a rak forh. “Nunram ih sualnak tansan in Pathian ih fate pawl sunloihnak ah nung cio uhsi. Leitlun ah thudik, dingfelnak le remdaihnak hrang nehnak ngah dingah cangvaihnak tuah cio uhsi,” tiah Filipino Cardinal in a rak sim. Philippines ram, Manila khuapi, the Quirino Grandstand ih thu a sim mi ah, Archbishop Cardinal Advincula in leitlun mi pawl runnak ding hrangah Jesuh Khrih ih tuar mi pawl hlawm dingah zumtu pawl hnenah a rak forh.

          Cardinal in “kan innhnen pawl thawn tuar tlang in khat le khat sunsak aw cio uhsi. Kan unau pawl hnenih thleng dingah, a hleice in harsatnak a tuartu pawl hnenah,” tiah biakthawinak ih tel tu mipi pawl hnenah a rak sim. Pawlpi ih tuanvo neitu pawl in puai ni Missa Sumnak ah mask hruk in Black Nazarene zuk fate tampi keng phah in a mal bik mipum 92,000 hrawng an rak tel tiah an sim. CBCP News in Jan 08, Black Nazarene puaini hngilhlonak tuah dingah quirino Grandstand ihsin “Walk of Faith” (zumnak ih kekarnak) ah Biakthawinak ih tel tu mipum 88,000 hrawng an rak tel tiin a rak tarlang.

          Six Kilometers “Walk of Faith” (zumnak hrang kekarnak) cu Quirino Grandstand ah zing 1:00 am ah an rak tuah thok ih Jan 8, 4:00 am ah Quiapo Biakinn ah an rak theh suak. Quiapo Biakinn ih simrel theinak neitu, Fr. Earl Valdez in ‘him zet le timtuah mi vekin kan rak tuah thei ih caanserh ah siatsuah awknak khal a um lo,’ tiah a rak sim.

          Covid-19 pulhnat ruangah Pawlpi in traditional Traslacion “Catlang lole cangvaihnak sirhsan mi Spanish term) cu tui kum hrangah cun rak tuah thei sal lo ih kumtin ih tuah mi traditional Traslacion a dang zawngih tuah a si vekin, tui kum 2023 ih “Walk of Faith” velnak theih ternak a rak nei. “Walk of Faith” zumnak ih kekarnak ah Traslacion ih neih mi Jesuh Khrih ih nunram zuk Thinglamtah a rak tel lo. “Biakthawinak ih a tel tu pawl, zuk tel lo in caanserh ih tel daan, malte sung a si ko nan a thar in kan suai sal thei ding tiah ka ruat,” tiah Fr. Valdez in a rak sim.

          Hi thuthang cu RVA thuthang ih kan ngah mi a si.

https://bit.ly/3WixFVI