Haiti ram ih a cang mi a hlawhtling lomi thuneih nak long nak cawl dingah Pope in zangfah dil July 11, 2021

Haiti ram ih a cang mi a hlawhtling lomi thuneih nak long nak cawl dingah Pope in zangfah dil

July 11, 2021

         Kan dung kar ah Haiti ramah thuneih nak long nak a cang. Cumi dinhmun ruangah ram khel lam a remdai lo ih hleiah tuahmawh nak khal a cang. Cumi tuahmawh nak pawl cawl dingah Haiti President Jovenal Moise thah a tuar hnu ni malte a rei hnu ah kan dung zarh pini Angelus thlacam theh hnu ah zangfah a rak dil. Cutivekin UN le US ralkap pawl in rampi ih cozah upa kilhim dingah, cozah khal dinhmun dai dingah zuam asiih, hrilawk nak a zamrang thei bik in timtuah a si thu, Haiti ram hrangah le ram mipi pawl hrang khalah thlacam sak dingah tuletu a rak sim.

          Pope in Haiti ram ih Catholic Bishop pawl dilmi hriamhrei thlah in minung nunnak thah nak pial in ulenau vekin hmun khat ten um tlang nak, midang hrang thil tha tuahnak, Haiti ram ih thanso nak tuah tuannak pawl tuah dingah a rak dil. Tuahmawh nak cawl in rampi remdiah nak le lungrual ten um tlang thei nak ding hmailam din ding mi lam pawl thok sal dingah a forhfial.

          Haiti President nupi Martine Moise khalin kap a tuar ih tuamhlawm asi rero laiah mipi pawl an hmailam zin ihsin pial lo dingah a forhfial. Amah cu maithal keng tu pawl ih kap nak vei tampi a tuar. President cu vei 12 kap a si ih, kam khat hman a tong man lo. President nupi cu tihphan ding dinhmun ah a um nan a thih ni kim hrih lo ruangah America ah vanzam thawn phurh asiih Miami siizung ah tuamhlawm a si. President nupi in rampi cu amai lamzin ihsin a pial thei lo. President ih thi cu san nei lo in um thei lo ding tiin thu a cah.

Thilcang nak ih a tel tu pawl kaih an siih, zingzoi rero a si.

          Himi thuneihnak long nak cu Colombia ralkap ihsin suak mi 17 le America ram mi sinak a la tu Haiti miphun 2 pawl kaih ngah an si. Mi 3 cu kah that an si. Mi 8 cu an tlan man. Himi thuneih nak long nak ih dunglam ah zobik a um timi zingzoi rero lai a si. Ziangruangahtile Haiti rampi tlasia dingah tuah nak a si. A tu dinhmun ah reilote sung tuanvo a la tu Haiti ramih tuanvo nei tu pawl in UN le US hnen ramsung buai nak a dai tiang kilhim nak ralkap thlahsak dingah zangfah an dil. UN ih kilhim nak ralkap pawl cu 2004 ihsin 2017 tiang Haiti ram ah an um. US ram in cun kilhim nak ralkap thlah hnakin FBI le rampi kilhim nak pawlkom sungtel pawl lawng an thlah ding a si. Haiti ram ih ramkhel lam thu pawl cu kum zabi lai ah thuanthu a rak um. A tui tum ramkhel lam hotu pawl thah nak le ram khel lam buainak cu hawl in an thok sal a si. Himi thuthang cu Vatican thuthang ihsin kan don mi a si.

Photo courtesy of  (ANSA)

https://bit.ly/3wyjDm4