A hlan ih MEP Pathian riantuantu pawl Mithianghlim ih khaisang dingah Vietnam Bishop pawl in tuah thok. (May 05, 2022)

vietnam_catholic_bishop_pawl_in_mep_siangbawi_pawl_mithianghlim_dinhmunih_khaisang_dingah_zuam

A hlan ih MEP Pathian riantuantu pawl Mithianghlim ih khaisang dingah Vietnam Bishop pawl in tuah thok.

(May 05, 2022)

         April 25-29 tiang Vietnam ram, Thai Binh Diocese ih tuah mi Bishop pawl thureltlangnak ah Vietnam ram Catholic Diocese 27 ih Bishop pawl, Singapore ram ih um Vietnam ram ih Pope ai-awhtu Archbishop Marek Zalewski, Msgr. Miroslaw Stanislaw Wachowskai pawl ih hohanak thawn Vatican ram tinkim pehtlaihnak zungih ai-awhtu pawl an rak tel.

         Cui thureltlangnak ah France riantuantu, Bishop pahnih a si mi Francios Pallu MEP (1626-1684) le Pierre Lambert de La Motte MEP (1624-1679) te Mithianghlim ih khaisannak hnatuan pawl thok dingah Vietnam Bishop pawl in lungkim in an rak reltlang. Hi Bishop pahnih cu Asia nisuahnak deng pawl ah, (a hleice in Vietnam ram le Catholic Pawlpi hrangah) hmaisabik ih thleng tu MEP (Paris ih um ramdang riantuantu pawlkom) ih riantuantu pawl an si. Bishop pawl cu Asia nisuahnak deng ih Catholic Pawlpi thangso dingah le thuthangtha phuang dingah rak zuam tu pawl an si.

         Bishop Francios Pallu cu MEP dintu dinhmun thawn a hleice ih nemhnget mi a si ih France ram The Center-Val de Loire hmun ih um mi Tours khuapi, Saint Saturnin Parish ah 1626, August 31 ah rak suak tu a si. A mah cu hnamsang mi sungkua in a si ih a pa cu Tours khuapi ih khuabawi, thuron mi lawyer pakhat a si.

         Bishop cu 1650 ah Puithiam cannak a rak ngah ih 1658, July 29 ahcun Heliopolis hmun ih tuanvo neitu Bishop, Tonkin hmun ih Diocese thurontu ah tuanvo an pek. (Tonkin hmun cu Vietnam saklam, Tonkin, Laos le China nitlaknak saklam ramthen 5 thawn kom mi hmun a si.) A mah cu 1684, October 29 ah a nunnak a rak cem. Cui caan ah Fukienin Muyan, Fujian, China ah Diocese thawn pehpar ih thurontu dinhmun in tuanvo a rak lak.

         Bishop Pierre Lambert de La Motte cu MEP  bawmtu a si ih 1624 ah a rak suak. 1655, December 27 ah Puithiam cannak a rak lak.1658, July 29 ah Fr. Alexander VII in Cochin or Cochin-China (Vietnam thlanglam) hrangah hmaisabik Vicar Apostolic ah tuanvo a rak pek.

         A mah cu Puithiam pahnih a si mi Fr. Gabriel Bouchard le Fr. Jacques de Bourges pawl thawn Tonkin ah Pawlpi din dingah an rak feh. A mah in 1970 ah ‘Thinglamtah a duhtu pawl’ tiih kawh mi nunau pawlkom pakhat a rak din. 1679 ah Thailand ram, Ayutthaya khuapi ah a nunnak a rak cem. Mithianghlim sinak a sangsang ih khaisang dingah Catholic Pawlpi in thenthum in a then. Pakhat nak cu Venerable dinhmun (upat tlak) a si ih Pope in a thi tu ih upat tlak mi nunram, a ap awknak nunram le a ralthatnak nemhngetnak a si. Pahnihnak cu Blessed dinhmun (upat hleice mi) a si ih hmaisabik a thenkhatnak a ngah tu hrangah Mithianghlim ih khaisannak tuah lai ah cui upat tlak mi ih thlacam sak nak thawn mangbangza thawm huham pakhat a lang hnu lawngah a pahnihnak an pek.

         A pathumnak cu Saint (Mithianghlim) peknak a si ih a pahnihnak mangbangza lang ding a tul. Tui caan ah Vietnam ram ah Archdiocese 3, Diocese 24, riantuantu Bishop 26, congregation 200, Sr. 31,000 le Catholic mipi taan 7 luan an um. Hi thuthang cu RVA thuthang ih kan ngah mi a si.

https://bit.ly/3yljVkD

Add new comment

2 + 15 =