Hong Kong Cardinal thuhla fiang dingah thuthennak zung thleng

Hong Kong Cardinal thuhla fiang dingah thuthennak zung thleng

            Hong Kong Bishop Joseph Zen cu amai thu fiang ter dingah May 24 ah Hong Kong thuthennak zung a thleng. May 24 ni cu kumtin Tuluk ram ih Catholic kohhran hrang ahleice thlacam ni a si. Kum 90 asi zo mi Cardinal thawn adang democracy thu ah a lang deuh mi upa 4 khal thuthen nak zung an thleng. An zaten 612 thu thawn puhmawh a tuar tu pawl an si. Cumi thu cu minung le  minung zangfah nak in Democracy thu phur zet ih cangvai tu pawl tha pek nak bom nak a si.

            Agence France-Presse (AFP) zung ih an sim nak vekin mawhpuh a tuar tu mi 5 cu mawh an neih lo thu an el. Ziangruangahtile minung bomnak hnatuan tuan dingah polic zung ih hmin nemhnget dingih pelh nak cu sual nak a silo tiin an el. Asinan sual nak a si ahcun dolar 1274 pek ding. Cardinal cu aralai dingmi September 19 ah adang veikhat an ko sal ding. Polic zung ah Hong Kong Diocese ih Vicar general Fr.Joseph Chan a feh nan amai dinhmun in Diocese ai a awh lo thu AFP in a sim.

            Kumtin May 24 cu "leitlun thlacamnak ni" tiin Pope Benedict XVI in 2007 ah a than. Cui zan ah Cardinal Joseph Zen cu Tuluk ram hrang Missa tuah dingah program a nei cia. Italy, France, Germany, Sweden le adang ram pawl ih ram palai pawl cu Cardinal ih thusim mi ngai dingah thuthennak zung an thleng. Cardinal cu May 11 niah kaih a tuar. Asinan aamahkhan thawn cuini zanlam ah a suak sal. Himi a luat nak ah Europe ram pawl ih ram palai pawl khal an um. Vatican ih simrel thei nak a nei tu pakhat in Cardinal ih thu thawn pehpar in thaten a zingzoi thu a sim. Tuluk le Hong Kong thunei tu pawl dinhmun in Democracy a duh tu pawl hnen tumtah in kai nak, a dik lo mi thu pawl puh nak tuah lo dingah, hivekih tuahnak ah Cardinal Joseph Zen khal a tel tiin White House thuthang secretary Karine Jesan Pierre in a sim.

            England paliment khal in Cardinal kaihnak cu a tha lo zet mi a si thu a sim. Pope Francis khal in zarhpi ni sunlai thlacam theh ah Tuluk ram ih Catholic mipi pawl le Catholic biaknak lam hotu pawl ih buaibainak nunram le dinhmun pawl cu amai dinhmun in thaten a zingzoi thu may 22 ah a sim. Pope cu Cardinal Joseph Zen tiin hmin langter asi lo mi Tuluk ram ih Catholic mipi pawl hrang thlacamsak dingah, cutilawngah Tuluk ram ih Kohhran cu Nu pawlpi thawn famkim ten kom a theih ding. Amai Gospel thu a phuan nak silhkhah sak a theih ding tiin a sim.