India ah Catholic Sayamah pakhat ‘Padma Shri’ laksawng sunloih  (November 10, 2021)

India ah Catholic Sayamah pakhat ‘Padma Shri’ laksawng sunloih 
November 10, 2021
           Sayamah Trinity Saioo cu November 9 ah India President Ram Nath Kovind ih ‘Padma Shri’ laksawng thawn an rak sunloih. A mah cu Catholic tlawng pakhatah Primary School tlawng sayamah pakhat a si. A mah cu mipum 1500 hman kim lo mi Mulieh khua in a si. Asinan, leitlun killi ih hminthang zet mi rimhmui a rak suak ter. Sayamah cu kum 53 a kim zo ih Jowai Archdiocese, Mawkyndeng Parish in a si. Cu tawk sungah a rak ciin mi rimhmui cu mi tampi ih theih dingin a mah rori khal in a rak ciing ih a khuapi pawl khal ciing dingin tha a rak pek ih India ram ih hmeh rimhmui masala cu leitlunhuap dawr tiang thleng dingin a rak tuah thei.Tu-ah cun a mah sunloih mi laksawng cu India ramih a pathumnak a sang bik mi laksawng tacik a si. 
           Catholic nunau pakhat khal a si; Nu pakhat khal a si; Hramthok tlawng (Primary School) zirh tu sayamah khal a si; Tlawngta pawl ih sun caw suannak lam ih tuanvo nei tu khal a si; Lothlo tu a si vekin midang a mah vek nunau pawl tla ram acozah ih thu suah le tumtahmi pawl thawn bawm in innsang ei in lam remcang dingah a bawm rero thu AVA ih thusuh awknak ah a rak sim. Hi mi tumtahnak cu khua fate pakhat ah 2003 ah an rak thok. Hi  hmeh rimthaw zet masala cu 2023 ah metric ton 50,000 tiang suah thei dingah acozah in a ruat. Tumtah mi pawl dil sak men lawng si lo in leiram um daan a mah rori va zoh dingah cek fel a si theu. Hi cangvaihnak rak tuahnak cu ram ih sunloihnak tacik ruahsan ruangah a si lo. Mi harsa, tha mal mi pawl ih nunram khaisang dingah a si. 2003 ah hi hmeh rimhmui a ciing tu pawl hnenah bawmnak a dil thu a than. Curuangah khuami nunau pawl hnenah ciing cio dingah a rak forhfial. A thok lam ah a ciing tu 700-800 tiang a rak thang. Cu tikah khat le khat bawm aw thei mi pawlkom pawl ko aw in thathnemnak um deuh dingah lam an rak hmuh.
           Lo hnatuan cu nu le pa pawl ih rei ma zet ih tuan mi a si. Pi le pu, nu le pa pawl san lai ih rak ciin mi a si. A mah cu Biaknak lam ih zuam zet tu Catholic nunau a si ih hlei ah Parish ih nunau pawlkom ih secretary tuanvo la tu khal a si. Ca a zirh lo ni pawl ah cui hmeh rimhmui ni pho nak, ah nak, rialnak pakhat khat a tuah theu. 2014 a thlen ah thatnak lam a rak pan. India ram ih thil ciin nak zungin sayamah pawl ih an khua suak hmeh rimhmui cu a dang khua suak mi hnak in a tha sawn tiin a nemhnget. Thil rawi nak ah khal hmanhman ten an tah. Curuangah a dang hmun pawl hnak ih tha sawn a si thawn mi in an duh deuhdeuh. 2015 a thlen tikah hnatuan nei tu pawlkom pahnih thawn pehtlaih awk nak an tuah ih sumpai cawi nak pawl thawn tha zet in an rak tuan thei. A mah rori khal in dawm pawl tha ten hmang dingah a rak hoha. 
          A mah lawng si lo in pawlkom thawn an rak tuan tlang. Hi tiih a tuannak cu a man tuk ruangah a si lo. Fa te paruk a nei ih fapa pathum le fanu pathum a nei. Upabik pahnih in an bawm. A dang pakhat cu University a kai lai. A dang pakhat cu Master a kai rero. Neutabik sang cu phun 11 a kai rero lai ih nautabik nu te cu phun 8 a kai lai. Hi vek in tuah ding tampi a nei ko nan a mah le a fate pawl cu Zarhpi ni Missa sumnak ah pelh lo in an tel theu. 
          Biakinn ah siseh, inn pawl ah siseh, thlacamnak caanserh pawl ah siseh, a nunram khuasak daan sim dingah an dil tin ten a rak el dah lo. Thiang Thlarau ih lamhruainak vek in a rak sim theu. A duh zet mi Bible catlang cu “Pathian uknak le a felnak hawl hmaisa uhla thildang hmuahhmuah cu a lo pe bet ding a si” ti mi Mt 6:33 sungta a si. 2018 a thlen tikah cui hmun in acozah in a mai umnak hmun kiangkap ih thil ciinnak pawl cu a mah rori in a hoha. Covid-19 in a hnatuan ah a rak hnaihnok lo. Ziangah tile an mah cu mi feh mal nak hmun ih an um ruangah a si. Nathrik hmuh mi a rak um lo. Covid-19 ruangah vah tawih rikhiah caan ihsin thok in lothlotu pawl cu cui hmeh metric ton 16 an rak suah thei. Nitin hnatuantu 20 hrawng cu an hnatuan tha ten tuan thei dingah an zuam thei. 
          Harsatnak a tong tu innsang pawl ih thuthang, nunau karlak ih theih thiam lo awk nak, innsungsang thuhla pawl theih a si le cui thuhla a dik zawng ih tawlrel ta lo cun thin a nuam lo thu le an mah bawm nak, ruahnak peknak pawl a tuah sak theu thu pawl a rak sim.
    Hi thuthang cu RVA thuthang ih kan ngah mi a si. 

https://bit.ly/30g16B7