India ram ih Catholic mino pawl in Christmas puai cangvaihnakah ‘rualpi pakhat rawldonak’ caanserh tuah (December 04, 2021)

India ram ih Catholic mino pawl in Christmas puai cangvaihnakah ‘rualpi pakhat rawldonak’ caanserh tuah

December 04, 2021

         India ih Catholic mino pawlkom in Christmas puai hmuahnak thawn a sunglawi zetih duhsan a famkim zet mi ‘rualpi pakhat rawldonak’ cangvaihnak an rak tuah thok. Ziangah tile Christmas cu nunphung lam nuamnak tuah mi puai a si lo. Christmas cu hmuihmel lam puaipi a si lo. Kumkhua thawn pehpar mi thu pawl ruahnak caan a si. Pa Pathian in a mai, pakhat lawng a si mi a Fapa cu leitlun mi pawl a duhdawt ih sualnak sungih luat dingah leitlun ah a thlah mi ruahsan in Christmas caan ah a danglam ih nunphung pawlkom ih tulsam mi silhkhahnak cangvaihnak pakhat tuah an duh. Khatlam ih sim a sile Christmas ih ti duh san a um mi nuamnak cu mai kiankap unau pawl thawn nuam tlang dingah a si.

         Hi mino pawlkom cu India ram ih Catholic Bishop pawl pawlkom hnuai ih um nemhnget mi pawlkom pakhat a si. India dinhmun in a liam zo mi kum 60 ihsin thokin nunphung pawlkom thansonak hrangah leilungpi dilnakah a thupi zet mi ram pakhat a si. Asinan, sumdawnnak thansonakih ngah mi vekih covo cu tui ni tiang a um hrih lo. Curuangah leitlunhuap ih a pathumnak ram ih farah bik mi ram sungih a tel lai thu, ziangah tile mipum taan 84 cu farah dinhmun ih an um lai thu, India ram dinhmun in 2021, ‘Global Hunger Index (GHI) (leitlunhuap ei in daih awk lo nak) cazin ah leitlunhuap ram 116 sungih ram 101 dinhmun ih a um rero thu, an mah theh ih a um mi ram pawl cu a mai innhnen ram pawl a si mi Pakistan, Bangladesh, Naple pawl an si.

         2020 ah India cu ram 94 nakih a rak um thu, tui cangvaihnak tuahnakih tumtah mi simfiang nak ah hi cangvaihnak a tul tu pawl hlawmnak, hlawm duh mi sumpai khawlnak le mifarah harsa pawl umnak hmun ah Christmas puai hlan ah ei in pawl an zem ding thu, mipum 1000 an zem ding. Hi cangvaihnak cu India ram ih Archdiocese pakhat a si mi Delhi ih mino pawl in Bethania tindan Tlawng ih an rak thok thu, hi tindaan cu mino pawl ih hohanak hnuai ah a um thu, pumcawm awknak Tlawng ah fimthiamnak pekin volunteer mino pawl umnak hmun pakhat a si thu mino pawlkom ih General Secretary Anthony Judy in a rak simfiang.

         Hi thuthang cu RVA thuthang ih kan ngah mi a si.  

https://bit.ly/3EzmVds