India ram ih Protestant Khrihfa unau hrekkhat pawl hmuhsuamnak an ton ruangah tihphannak thawn an khat (October 20)

 India ram ih Protestant Khrihfa unau hrekkhat pawl hmuhsuamnak an ton ruangah tihphannak thawn an khat (October 20)

              India ram a laifannak Chhattisgarh ramkulh sungih Kondagaon ramthen ih ummi Protestant Khrihfa unau pawl cu cutawk hmunih ummi Khrihfa a silo mi midang pawl in an inn le lo, an thilri pawl an siatsuah sak ruangah tihphannak thawn an khat ti a si.

Kondagaon ramthen sungih khuate pawl a simi Kakrabeda, Singanpur le Tiliyabeda tel in khuate tampi ah Khrihfa unau pawl ih inn le an neih mi thilri dangdang pawl cu Khrihfa a silo mi pawl in an siatsuah, an laksak ih an Khrihfa zumnak tansan in anmaih nunphung le zumnak an tawm ve lawng ah an khua le ram ah an um thei ding tiah Khrihfa pawl cu an hro rero.

             Cutiih Khrihfa pawl hmuhsuam an tonnak cu kan dunglam September 22-23 ih cangmi a si. Hitiih hmuhsuamawknak a suah hi Khrihfa silomi mipi in mipum malte lawng a simi Khrihfa pawl khal anmah thawn kop aw in anmaih nunphung le biaknak tawmve ding an duh ruangah a si. Ramthen a cozah lam cun daihnak a um zo an ti nan, thubuai umnak khuate pawl ah tutiang police ret sak an si lai. Tihphannak ih zelhmi Khrihfa minung 40 lai ihsin 20 hrawng cu an inn ah an tlung ngam hrih lo.

             Kondagaon ramthen sungih ngunkhuai lam tuanvo neitu Pushpendra Meena cun tuih kan dinhmun cu a dai riahriah zo ih inn le lo tansan tu pawl khal in an remcan daan ih zir in an tlungsal thei ko ding ti’n le kaphnih in rualremnak nei dingah lungkimnak an nei zoti’n a sim nan, tutiang ah thubuai umnak khuate pawl ah cun police ret sak an si hrih lai thotho a si.

         Thu zingzoitu Plice Bawi pakhat, P. Sundarraj cun tuih kan dinhmun hi ralrin tul zet mi a si ruangah tuanvo neitu pawl khal buainak cangsal lo dingin ralring teih thu an tawlrel rero thu a phuang. Tuihnu buainak a tuahtu le inn a siatsuah tu pawl cu daan vekih thuthen hluahhlo an si ding thu khal a sim.

Asinain, Kakrabeda khuami Khrihfa zumtu mino pakhat, Shivram Poyam cun, “Thubuai umnak hmun ih um Khrihfa pawl cu tihphannak thawn an khat. A hlan ihsin buainak cu a um phah theu ko nan tui tum lawngah inn le lo tansan tiang buainak a thok mi a si. Minung 500 lai telmi mi burpi in kan inn pawl le kan thlairawl pawl in siatsuah sak. Ka inn le midang inn 6 hrawng in siatsuah sak ih khuami pawl cun Khrihfa zumnak tansan ih anmaih zumnak tawmpi ve dingah in forh” ti’n a sim.

         Cuih khuami a hmin rel duhlo mi Khrihfa pakhat khal in “Tlun lam thuneitu pawl cun kan dinhmun a tha zo an ti nan, hmuhthiam awk lo nak cu a um lai thotho. Khrihfa innsang pawl cu thinphang zet in kan um lai. A hlan ah vuaknak le hremnak a phunphun kan rak tong zo ih nehhnu khal ah a um nawn lo ding ti’n sim a theih hrih lo. Kan nunnak le kan neih thil hrangah tihphannak thawn kan khat rero lai” ti ah a sim. Congress party hotu Sonia Gandhi hnen ih himi thuhla kan thlenpi hnu lawngah kan area ih police pawl in buainak a tuahtu hrekkhat pawl parah cangvaihnak an nei lai ti khal in a sim bet.

Tiliyabeda khuami Khrihfa nupinu pakhat khal in Khrihfa unau pawl hi thleidannak le hmuhsuamnak an ton rero thu a sim. “Khuami pawl in biaknak lam daan ih thil kan tuah tikah in telpi lo an timi kha thudik a si lo. An puai tuahnak ih kan va tel khal a sile an thil tuahmi le an biaknak daan siatbal tu tiih in hmuh ruangah sumpai tampi pi in lak. Khrihfa kan si ruangah hnawihnih zarh ah in ruat” ti’n khal a sim.Cuihlei ah, “Kan hotu pawl in thubuai a um hnu police tuanvo neitu pawl le ngunkhuai tuanvo neitu pawl hnenih pakhatkhat tuahsak ding an va dil tikah, ngunkhuai tuanvo neitu cun in siatsuah sak mi thil pawl cun man an neih tawk ih kuansak dingah in kam. Cule buainak a tuahtu pawl khal buainak tuah nawn lo dingin le kanmah lam khal in thiehthiam sak dingahz angfah in dil” ti khal in cuih nupinu cun a sim bet.

           Chhattisharh Christian Forum hotu, Arun Pannalal khal in Chhattisgarh ramkulh Bastar kiangkap ih ummi Khrihfa pawl cu an zumnak tansan dingah a phunphun in hnaihnoknak le hronak an tuar rero thu le Hindu biaknak sungin miluarkai pawl in khuate ih Hindu hotu pawl hnen ah Khrihfa pawl dodal dingih an tokhrok ruangih buainak tiang a suak mi a si thu a sim.

Source: LiCAS.news

https://bit.ly/3m8iBsk