India ramah ni 4 sungah Catholic Siangbawi 14 rori thi April 24, 2021

India ramah ni 4 sungah Catholic Siangbawi 14 rori thi

April 24, 2021

            India ram cu covid 19 in ruah lo pi'n a namnuai sal ih a luan cia mi thla khat sungah Catholic Siangbawi 20 rori an thi zo. Hi tumhnihnak covid 19 natnak thlihrang ih namnuainak in India ram ih harhdamnak lam kilhimnak system cu pahbal in April 20 in 23 ni tiangah Catholic Siangbawi 14 rori an nunnak a liam ter a si.

            Leitlun covid 19 natnak ih vuaknak zualbik lakih a ni thumnak cu kandung zarhte ni ah tar lang a si. India ramah covid 19 natnak ih kaih mi mithar 346, 786 an pung ih India ram ah tu tiangih covid 19 natnak a tuar zo tu hi million 16 an um thlang ih USA lawng hi India hnak ih covid 19 mina nei mi a si. Harhdamnak lam zungpi ihsin an than miah a luan zo mi nazi 24 sungah covid 19 ruangih a thi mi 2624 rori an um ih tu tiang ah India ramih covid 19 ruangih a thi mi cu 189, 544 an si zo.

            Tuitum ih harhdamnak lam thawn pehpar mi buainak in ruak vuinak lam khalah tampi buaibainak a suah ter. Innsungsang tampi cu anmah tansantu an duhdawt mipawl ih ruak ur dingah ni tampi sugn an hngak rero a tul. India ram ih Catholic Kohhranpi cu Latin Rite hmang mi le Syro-Malabar Rite le Syro-Malankara Rite timi Easter Rite pawl a hmang mi zumtu pawl komkhawm mi a siih diocesan Siangbawi le religions Siangbawi 30,000 lenglo in an rian rero mi a si. Kan dung nithum sungih a thi mi Siangbawi 14 pawl khal a luan zo mi thla khat sungih sin covid ruangih a thi mi Siangbawi 20 sungah a tel ve mi an si.

            Covid 19 ruangih netabik a thi tu Siangbawi cu Fr.Lijo Thomas a si. Fr.Lijo Thomas (kum 38) cu India ram ih covid 19 natnak karhbik nak, nitlak nak lam Maharashtra peng, Chandrapur khuapi ih Christ Hospital siizung piah April 23 ah a thi. Cuih ni thotho ah covid 19 ruangih a thi mi Siangbawi pawl cu Fr.S Christudas, Fr.Srinivasan, Fr.Diago Dsouza le Fr.Arulsamy te pawl tla an si. Himi thuthang cu Vatican thuthang ihsin kan donmi a si.

Photo courtesy of Vatican news

https://bit.ly/3eAaQsZ