Indonesia ram ah Missionary dinhmun in rak thleng hmaisabik pawl ih tel mi Siangbawi cu kum 88 ah a thi

Indonesia ram ah Missionary dinhmun in rak thleng hmaisabik pawl ih tel mi Siangbawi cu kum 88 ah a thi

Divine Word sungtel Siangbawi, Fr. Jan Olecki cu Indonesia ram ah Pathian hna tuan dingin Poland ram ihsin thleng hmaisabik lakih tel mi a si ih, November 4 ni, a kum 88 ah, Poland ram ah mual in liamsan a si.

Fr. Olecki cu 1965, July 29 ah Pathian hnatuanpi missionary dang pawl thawn Indonesia ram ih rak thlah mi a si. Ralbuainak a reh hnu ah, Poland a cozah cun cuih missionary phuaih pawl cu an ram suahsan dingah siannak a rak pek.

Fr. Olecki cu Poland ram, Mroczno khua ah 1934, December 3 ah a rak suak. A nu le pa cu leilet ih pum cawm mi Jozef le Mariana an si.

1949 kum ah Gorna Grupa ih ummi Minor Theological Seminary timi tlawng ah a rak feh ih, 1952 kum ah Nysa ih ummi St. Cross timi tlawng ah religious novice cang dingin a rak feh.

1953 kum ah, Pienino ih ummi, Divine Word Missionaries tiih hmin nei mi Pathian hnatuan pawl ih tlawng ah philosophy le theology fimnak a rak zir ih 1960, December 18 ah deacon dinhmun ah ordination pek a si. Cule, 1961, January 29 ah Siangbawi cannak ordination a rak ngah.

Nehhnu ah, Indonesia, Flores, Kisol ih ummi Minor Seminary tlawng ah tlawk uktu a rak tuan ih cuih tlawng ah 1974 ihsin 1978 tiang, Latin, German le biaknak thu pawl a rak zirh. 1978 hnu cun, tuukhal hnatuannak lam ah a pum a rak pek.

2012 ah Poland ram ah a kirsal.

Fr. Olecki cu Poland ram, Mission House of St. Joseph timi tlawng ih thlanmual ah phum a si ding.

Minor Seminary tlawng ih Latin a rak zirh dah mi tlawngta lakih pakhat a simi, Piet Sambut cun Fr. Olecki hi, Pathian lam ih zuam zet, siikaan nei zet le mitha zet lam hmuhtu pakhat a si tiah a rak sim.

“Anih cu a hnatuannak ah tuukhal tha pakhat a si ih a man caan hmuahhmuah cu thlacamnak ah caan a hmang; ahleice in, Rosary hi a cam theu. Siangbawi tlawngta pawl camibuai (exam) an tuahmi a kil lai hman ah Rosary a cam. Lamzin a feh phah le thirleng a to phah caan hman ah Rosary a cam theu” ti’n Piet Sambut cun a sim bet.

https://bit.ly/3X38h8d