Iran in a ram sungih mifarah pawl bawm in a nunnak a hmang rero tu Sister pakhat a dawi (Vatican news, June 11, 2021)

Iran in a ram sungih mifarah pawl bawm in a nunnak a hmang rero tu Sister pakhat a dawi (Vatican news, June 11, 2021)

                  Kum 75 tar, Sister Giuseppina Berti cu a rei hlanah Iran ram a suahsan a tul tariai a si. Anih hi Iran ram, Tabriz khuapi ih phaarnat tuar pawl umnak ah kum 26 sung rori mifarah pawl bawm in hna a rak tuan rero tu a si ih, tu ahcun Isfahan khuapi ih anmah Sister pawl ih innpi ah a um.  A visa than ding an siang lo ih, a tu ahcun mikhual/khualtlawng dinhmun men ih cohlan mi ah a cang. Curuangah Iran ram ihsin a suah cun, kum 77 tar mi a rualnu, Austrian mi Sister pakhat hrangah cun tuar a har ngaingai ko ding. Cuih a rualnu Sister khal le Iran ram ih phaarnat tuar pawl zohnak siizung pi ah kum 38 rori mipi rian rero tu a si ih, anih khal cu kum khat um bet theinak visa lawng an than sak ti a si.

                 Hi Sister pahnih te cu, biaknak le miphun thleidannak um lo te’n Iran ram ih mi damlo pawl bawm rero in kum tampi sung hna an tuan ero hnu ah, 1937 kum ih an rak sak mi an innpi tansan dingih dawi an si thlang. An Congregation hmin cu, the Daughters of Charity of St. Vincent de Paul a si ih, hi Congregation sungte Sister pawl cun Isfahan khuapi ah mino tete pawl fimthiamnak zirh phah in le training a phunphun pek phah in mipi riannak hnatuan keum reipi an rak tuan. 1942 kum ih Polish nauhak pawl, raltlan pawl le ralbuainak ih nulepa ih thihsan mi nauhak tampi hrangih pum an rak peknak pawl khal hngilh ding a si hrimhrim lo. A ngaingai ahcun, hi Sister pawl in Isfahan khuapi ah tlawng tumpi an rak din nan, 1979 ih ral a thawh hnu ah Iran a cozah in a lawng sal. Cule, tui a luanzo mi kum mal te sung cu, hi Sister pahnih in mipi hrang zianghman lenglam cangvaihnak an nei lo; ziangah tile, Christian zumnak ih mipi hruai duh men ih cangvai mi an si ti’n mawhphurh an tuar ding an phang.

                Tui Sister pawl ih innpi hi Isfahan khuapi ahcun Latin Catholic Kohhranpi ih neihsun thil pakhat a si ih, 1939 kum ih rak sakmi an biakinn te khal cu Isfahan khuapi ih thlengtu zumtu pawl hmuahhmuah Mmisaa sumnak ih an tel theinak dingih riantu Parish biakinn pakhat dinhmun ah a ding. Iran ram ah hin, Chaldean rite hmangmi Catholic, Armenian rite hmangmi Catholic, le Latin rite hmangmi Catholic ti’n Catholic zumtu pathum an um ih an zate’n Pope ih thuneihnak hnuai ih ummi Catholic zumtu hlir an si ko. Cule Iran ram pum ah Catholic zumtu mipum 3000 hrawng an um.

                 Tui Sister pahnih Iran ram ihsin an suah cun, Isfahan khuapi ah Latin rite hmangmi Catholic Kohhranpi a um nawn lo ding tinak a si mai. 2016 kum lai khalah, Isfahan khuapi ih Lazarist Catholic Siangbawi pawl ih innpi cu Iran a cozah in a rak long zo. Iran cozah upa pawl in an kekardaan le an thubotcat mi pawl vun ruat kir sal in, Sister pawl an ram ah um theinak khuan pe tahrat in an duhdawtmi mipi pawl rian theinak caan an pek sal ding beisei a um zet a si.

Photo courtesy of google image

https://bit.ly/3zwRhLx