Iraq ram ih covid 19 siizung pi meikang ruangah Cardinal Sako thinna April 26, 2021

Iraq ram ih covid 19 siizung pi meikang ruangah Cardinal Sako thinna

April 26, 2021

            Chaldean Catholic Kohhranpi ih lubik asimi Cardinal Sako cu kan dung zarhte niih, Iraq ram, Baghdad khuapi ih ummi covid 19 nat tuar tu pawl tuamhlawm nak siizungpi kang nak in minung 52 rori an thi ruangah a thin nat thu a lang ter. Cuih meikang ruangah mipum 110 in hliamhma an tuar ih a thi mi lak ihsin mi hrek khat cu mina tuamhlawm tu sungkhat unau pawl an si.

            Cardinal Louis Raphael Sako in zarhpi ni ih hnem nak ca a ngan mi sung khalah tuitum ih thil cang mi parih a thin nat nak le a riahsiat nak pawl a tarlang.

            Iraq ih thunei tu upa pawl cun meialh cu oxygen dawng pi puak in a hliau ter sin ih mina besia tuk pawl tuamhlawm nak lam ah a hei hrawh ciamco ti'n an sim. A thi sar mi an tam vivo tikah thinphang vansang ih ummi sungkhat unau pawl cun a hlo mi pawl an hawl ciamco ti'n theih a si.

            Cuihleiah Cardinal Sako in tuitumih thilcang mi cu milai le miphun vansiatnak asiih hivek ningzakza vansiatnak tong lo dingah tuah tul mi pawl tuah dingah kan zaten lung rual te ih kan din tlang a tul ti'n a ngan. Kohhranpi dinhmun in kan cozahpi siseh, humhim nak lam le harhdam nak lam tuanvo neitu pawl siseh, thinlung tha nei mi Iraw mi zate thawn diahnak, hngetkhoh nak, lungrual nak pawl tunding nak hrangah bom ding kan ralring ringring cia ti khal in a sim.

            Cardinal Sako cu zarhipini ah a kang zo mi siizungpi a va zoh tikah Iraq ram sungih thil um tu daan pawl a hmufiang ih a tah a suak. A luan zo mi kum 20 sungah Iraw acozah ih mpi riannak hnatuan a tuannak ah thansonak zianghman a um hrih lo thu Vatican thuthang hnenah tlawngkai nikhat niah a sim. iraq hi ram farah a silo, ram lian pakhat a si. Asinain, sumpai pawl cu tlunlam upa pawih zal sungah a thleng theh. Curungah siizung le tlawng tivek pawl khal riahsiat za dinhmun ah a cang thluh ih mipi rin nak khal tha te'n a pe thei lo.

            Hi thu thawn pehpar in Iraq ih an prime minister le president thawn khal tonawknak an neih thu Cardinal Sako in a sim. Chaldean Catholic Kohhranpi in tuitum meikang ih vansiat a tongtu pawl riahsiat pinak langternak ah $10,000 dollar a hlu. Meikang ih a thi mi pawl hrangah siseh, hliamhma a ngah mi pawl hrangah siseh, an ram ih daihnak le feknak hrangah thla a cam thu khal Cardinal Sako in a sim bet.

            Iraq ih prime minister Mustafa al-kadhimi cun tuitum ih meikang thuah harhdamnak lam tuanvo neitu pawl ih daithlannak ruangah a siih anmah hi mawhthluk dingan si ti'n a sim. Iraq acozah in Baghdad peng uktu bawi le harhdamnak lam vuanci (minister) telin tuanvo nei deuh apwl cu an hnatuan in a cawl ter ti khal theih a si.

            Hi Iraq ih vansiat tonnak parah Pope Francis khalin a riahsiat pinak thu zarhpini ih Angelus thlacam caanah a sim ih meikang ih a thi mi pawl hrangih thlacam sak ding khla forhfial nak a nei. Kan dung March thla ni 5-8 lakih Iraq a va thawn laiah Pope Francis in buainak le pulhnat ih namnuai mi ram sung mi pawl bomnak ding hrangah ti'n Chaldean Catholic Kohhran hnenah $350,000 dollar a hlu ta.

            Iraq ram hi tuah covid 19 pulhnat tumhnihnak an ton rero lai asiih, nitin minung 8000 laiin natnak an ngah thu khal theih a si. A tu ah cun covid 19 natnak a ngah tu hi a malbik mipum 100,000 hrawng an siih cumi sungin mipum 15,200 lenglo an thi zo a si. Himi thuthang cu Vatican thuthang ihsin kan don mi a si.

Photo courtesy of Vatican news

https://bit.ly/3u1T1JW