Italy ram ah a voihnih nak covid karhzainak ruangah Catholic Siangbawi 43 an thi November 30, 2020

Italy ram ah a voihnih nak covid karhzainak ruangah Catholic Siangbawi 43 an thi

November 30, 2020

          Italy ram ah covid nat a voihnih nak a karh sal hnu November thla sungah Siangbawi 43 rori an thi. Italian Bishop’s conference (Italian Bishop pawlkom) ih suah mi L’Avvenire thuthang in February thla ih covid natnak a karh ihsin thok in Italian Siangbawi 167 tin a tarlang.

          Tui November thla sungih a thi mi lakah Italian Bishop pakhat khal a tel ve. A mah cu a Bishop hnatuan ihsin a cawl zo tu Milan ih auxiliary Bishop Marco Virginlio Ferrari a si. A kum cu 87 a si ih November 23 ah covid natnak ruangin a thi a si. October thla thoknak hrawngah Caserta Diocese ih Bishop Giovanni D’Alise khal kum 72 tar in a thi.

          Italian Bishop’s Conference ih hotu bik a si mi Cardinal Gultiero Bassetti khal November thla thok hrawngah covid ruangah nasa zet in a na lawk. Kan dungzarh ih an check salnakah negative a si thlang ih cuih hnu cun a dam tha vivo ti a si. Cardinal Bassetti hi Perugia ih Archbishop tuan rero lai khal a si-ih Perugia sizung ah ni 11 sung rori “interview care” timi nasa zet ih tuamhlawmnak thawn zohkhen rero a si hnu ah Rome khuapi ih um Gemelli sizung piah a dam deuh hnu in caan hmang rero a si.

          November 19 ih a diocese hrangih thu a cah mi ah tui tum covid ruangih a harsat tuarnak lak ah minung ih dinhmun taktak a hmuhton mi le tuanvo nei tu pawl ih catbang lo rori’n an zohkhennak pawl a hmuhton mi in a thinlung a khoih nasa thu a sim ih thla a cam sak ding thu le harsatnak a tuar rero lai mi mina pawl hrang khal thla a cam sak rero ding thu a sim bet. Italy ram hi a tu ah covid natnak a voihnih nak a ton rero lai fang a si ih 795,000 lenglo in covid natnak an tuar ih February thla ihsin tu tiangah 55,000 an thi zo a si.

          Hi thuthang cu CNA thuthang ih kan ngah mi a si.

https://bit.ly/2Vj8ANz