Jewish Actor pakhat Catholic biaknak ah lut: Bawinu Mary cu ka duhdawt zet mi fala mawibik a si.

A nauhak lai ah biakinn pakhat sung a rak luh tikih Pathian ih Nu, Mary ih lemzuk a rak hmuh mi thu pawl mintapa cun a sim.

Jewish actor hminthang Gad Elmaleh cu France mipi pawl ih an uar zet mi minta pakhat a si ih, hnihsuah sai thiam lam khal ih hminthang a si. Anih in catholic zumnak a pom thu pawl le, Catholic biaknak sungih a luhnak ah Bawinu Mary ih thupit zia pawl mipi theih dingah a rak sim.

Gad Elmaleh (kum-51) cu Nonaco khuapi ih Princess Caroline ih fanu, Charlotte Casiraghi thawn thawn an rak umtlang dah ih fapa pakhat an rak nei.

Catholic biaknak ih a luhnak thuhla cu amaih film suah thar mi Reste un peu (Stay a while) timi sungah fiang zet in pholang a si.

Gad Elmaleh cu Jean-Marie (John Mary) timi hmin thawn baptisma (Tikholhnak) a lak ding ti a si. Paris khuapi ah theology a rak zir ih, 2019 kum ah London khuapi ih tuahmi laam le awnzai thawn St. Bernadette Soubirous ih thuanthu lemcwnnak ah a rak tel dah. St. Bernadette Soubirous cu Our Lady of Lourdes ti’n a lar zetmi Bawinu Mary ih langnak rak hmutu pakhat a si.

Gad Elmaleh cun Le Figaro timi French thuthang hnen ah “Bawinu Mary cu ka duhdawt zet mi fala mawi bik a si” ti’n a rak sim. Cule, France rammi a tam sawn in an Catholic zumnak langsar zet ih an nunpi lo mi a hmuh tikih a mangbang thu khal a sim.

Interview an tuahmi pakhat ah, a nauhak lai ih biakinn pakhat ah lut in Pathian ih Nu, Mary ih lemzuk a rak hmuh thu vun mangsal in a sim.

 “Langnak hmu khal ka si lo; lemzuk pakhat hmu men ka si. Asinain, tihphannak thawn i rak khat ter. Ka tap ih kan sungkua ih hmuh lo dingin ka rak relh; ziangahtile, in camsiat ding le zum tlak lo mi thil zumtu tiih in ti ding ka rak phang.

Gad Elmaleh ih film suah tharmi cu November 16 ah France ram ah onnak tuah a si ding. Himi film sungah amaih nu le pa rori khal an tel.

A nu le pa hi, Catholic biaknak sung ih a luh ruangah an lungawi lem lo nan, a tulsam mi pawl bawm dingah an timtuah thu khal theih a si.

Mintapa cun, “A si; himi cu thlarau lam thawn pehpar mi le biaknak lam thawn pehpar mi thlengawknak a si. Ruahnak menmen le a tak ih a cangmi thil polhcok mi khal tampi a um ko. Hmansehla, kum 50 ka kim hnu ih ciamciam te’n thusuhnak ka tuahawk mi a si,” ti’n a rak sim.

 “Pathian cu zo a si, a um ngaingai maw um ngaingai lo, khuitawk ah a um timi thusuhnak pawl ka ruat ciamciam ih Bawinu Mary in i ko ih i kilveng ti cu ka fiang” ti khal in Mintapa cun a rak sim.

“Ka nauhak lai ah Morocco ram, Casablanca khuapi ih biakinn pakhat ah ka rak lut dah. Morocco cu Christian pawl, Jews pawl le Muslims pawl umkhawmnak ram pakhat a si ih unau vekih tlanlen khawmnak zohthimtlak ram pakhat khal a si. Hmansehla, Christian biaknak le biakinn pawl thawn pehpar in sian lomi/kham mi tete khal cu a rak um phah,” ti’n Gad Elmaleh cun interview pakhat ah a rak sim.

“Biakinn tivek sungah ka rak lut thei lo; ziangah tile, sualnak a si, a kham khal in kham. Asinain, kum 6/7 hrawng ka kim ah, biakinn pakhat ah keimah te’n ka rak lut ih, ‘Aze, a rak tha zet ual, ziangah si pei biakinn sung luh in rak kham?’ ti’n mangbang ih a rak um thu khal a sim.

A film suah tharmi hin mipi thinlung sungah thusuhnak/ruahnak hrekkhat a suahpi ding a zum thu le, a hleice in, hi film cu tetti khaannak le duhdawtnak thuanthu a si thu pawl Gad Elmaleh cun simfiangnak a rak nei.

https://bit.ly/3GbabNZ