June 8, 2024 ni ih Bishop cannak ngahtu Msgr Francis Than Htun ih thuanthu tawi.

Msgr Than Htun

June 8, 2024 ni ih Bishop cannak ngahtu Msgr Francis Than Htun ih thuanthu tawi.
Yangoon, Catholic archbishop bawmtu thar Francis Than Thun cu a pa Johney Than le a nu Daw Mary San Hmwe tei in March 14, 1974 ah Mandalay, Minchian, Pagan Ngiang Oo Myone, Pabekung ah a rak suak. Suah pi unau pathum a nei ih Bishop cu a nauta bik le fapa neih sun a si. Bishop cu Karen kahpia ( Tuluk le Indian ) Kahpia a si.
Asuah hnu kumkhat a si hrawngah a pu umnak Rangoon ah an tlawn phah ah Alone Myone ih um mi St,Theresa biakin ah Baptism cu Rev. Fr John Swe hnen in a rak ngah. A pa cu cozah hnatuan a sivekin hmunkhat hnu hmunkhat an thawn vekin bishop kum 4 a kimah Yangoon ah an thawn ih Thinganyaunt myone, Tukwanah khua thar ah an rak um.
Zingtin a khawm theutu nule pa ruangah bishop khal biakinn thawn a rak nel zet ih Missa ngai nak ah a nuam aw zettu a si. Innsang ah zing thlacam, zamthlacam le Rosary nitin an cam ruangah Pathian biaknak ah a nuam zet tu a si. Culai ah mah le mah thei aw dingah a har ko nan Pathian ih kawhnak cu cui sin a rak thok tiah a mah in a sim.
Thingangyun ih St.Joseph biak inn ah Rev. Fr Dominic Khin Soe, Parish Priest ih a um sung ah 1985, April 14 ah ahmaisabik bawipa thi le sa a rak ngah. Cuihnu ah Rev.Fr Joseph Maung Win, Parish Priest a tuan lai 1988 kum May 15 ni ah Yangon Catholic Bishop Gabriel Thohey Mahn Gaby ih kut sungin Christma thapek nak a rak ngah.
1991 ah phunhra arak ong ih 1992 ah Pagu ih St. Joseph Minor seminary ah a lut ih English, basic Latin ca, Pawlpi thuanthu, Bible thuanhtu le Catholic pawlpi ih zirh mi pawl a rak zir. 1996 ah Philisophy in buai a rak ngah. 1992-1996 kum sungah Pagu Myo ah St. Joseph minor seminary ah fimzirnak a theh in Pyin Oo Lwin myo ah Puithiam thlawngah Phylosophy cu 1996-1998 tiang a rak zir. Cui fimzir kumah English, Latin, thinlunglam le nuntuzia pawl le thlarau lam thawn pehpar mi a rak zir. Cui fimzir kum pawl ah rampi huapah a sint 1-10 sungah a pasarihnak in a rak ong thei.
Cuihnuah 1998-2002 kumah Yangon ih St.Joseph Puithiam zirnak tlawngah kum li sung a rak zir theh hnuah Canon Law, Moral Theology, Christology, Penumatology, Liturgy, Scripture le a dang fimthiamnak pawl khal a rak zir theh. Kum 10 sungah Puithiam pakhat ih theih tul mi fimnak pawl a zir theh hnuah December 3, 2001 kum St. Francis Saviex puai niah Deacon sinak a rak ngah.
Cuihnuah March 19, 2002 kum st.Joseph puai ni ah Yangon Catholic archbishoop Thohey Mahn Gaby kut sungin Puithiam sinak a rak cohlang. Puithiam a can ni ah Puithiam pakhat dinhmun ih a hmaisabik ni ih a thlacam mi cu "aw Pathian Bawipa ka neih mi zaten nakut sungah ka lo ap. Na salpa kei ih ka san tlailonak ruangih sunnak ka ton tin ten Bawipa lam in hmuh awla ka kiangah in bawm hram aw'' ti hi a si.
Puithiam dinhmun in rian a rak tuannak cu 2002 kumah St. Joseph, Catholic Church, Thingangyun Parish ah bawmtu Puithiam in thla 6 sung tuanvo a rak la. 2002 kum sungah Yangon Catholic archbishop hrangah Diocesan Administrator din hmun in Bishop Sotero Phamaw ih lam hmuhnak vekin St. Michael Catholic Church, Yunpinkoh Parish ah bawmtu puithiam dinhmun in thla 6 sung tuanvo a rak lak. 2003 kum ah Caritas hnatuan (Yangon)ah Animation Coordinator dinhmun in tuanvo a rak lak ih minung lam thawn pehpar mi thu Philippine ram, Cagayan de Oro, Mindanao ah diploma a rak ngah.
2007 kum ah Caritas Myanmar (yangon) ah director dinhmun in tuanvo pek a si. 2008 kum May thla ih a cang mi Nakit thlipi ruangih harsat tuar pawl hrangah bomnak le dinsalnak hnatuan pawl a ti thei tawk in a rak tuan ih a harhdam lonak ruangah Caritas (Yangon) in a rak cawl. Cuihnu 2008 kum September ah America ram Sanfrancisco khuapi ah riantuan dingah tuanvo pek a si ruangah cu mi timtuahnak ah 2011 tiang a rak tuah.
2011 ih thok in America ram, Sanfrancisco ah Myanmar Catholic pawl le cuihmun ih kawhhran mipi pawl hrangah rian a rak tuan. Cuitlun ah CPE (Clinical Pastoral Education) zirnak cu UCSF (University of California, San Francisco) ah 2016-2017 tiang kumkhat sung fim a rak zir. 2007 kumah Sanfrancisco acozah Siizungpi ah Puithiam dinhmun in tuanvo neitu in 2021 May thlacem tiang a rak tuan.
2021 kum June 26 ni ah Kawlram ah a tlungsal ih 2021 kum October 4, ni ah Archbishop Cardinal Charles Bo ih tuanvo peknak vek in St.John (Candawmen) ah Parish Priest dinhmun in a tui hi mi bishop tuanvo pek a si tiang tuanvo nei in rian a rak tuan. 2024 kum March 26 ni ah Pope Francis in Yangon Catholic diocese hrangah bawmtu bishop din hmun in hrilnak a ngah thu phuan suah a si. June thla 8 ni, 2024 ah a thianghlim mi Bawinu thianghlim thinlung puai ni ah Yangon Archbishop, Cardinal Chales Bo ih kut in Bishop cannak a rak ngah a si.

Add new comment

1 + 8 =