Kawhhran thuthang (April 16, 2024)

Kawhhran thuthang (April 16, 2024)
Falam Zone in Falam peng Khuapual khua ah April 3-9 ni tiang mino Pathian thu zirnak an nei ih mino mipum 230 in thu zirnak an nei thei a si. Mino Pathian thuzirnak ah Catholic Kawhhran mi pakhat ih theih tul mi Sacrament 7, Sualthlahnak, Puithiam cannak, Baptism le Confirmation, Thit umnak le Khrihtian mi pakhat ih neitul mi Christian nuntuzia pawl zirnak an nei a si.
Cun Zarhte ni (April 6) ah Hakha Diocese ih hruaitu Bishop Lucius Hre Kung kha tualsung mi le mino pawl in sunglawi zetin hmuahnak caanserh an hmang. Cun Zarhpi ni April 7 ni ah Bishop in Catholic Kawhhran, biaknak ih a sang bik mi Missa raithawinak hoha in a tuah ih cu mi sungah Thlarau thianghlim ih thapeknak ti kan kawh mi Confirmation peknak a nei ih cu mi ah tleirawl minung 140 in an co hlang a si. Cun April 8 ni Tlawngkai ni khat ni ah Khuapual Catholic Pathian thusimtu Saya a si mi Saya John Kap Sial Thang in Pathian hna a tuan nak kum 40 kim Pathian hnen lungawi thusimnak a nei ih Bishop le Puithiam pawl ih hohanak in Missa sumnak cu a cem tiang an theh suak thei a si.
Cun April 9 ni Tlawngkai ni hnih ni ah Bishop cu a Tuukhal khual tlawnnak a si mi Valung Parish, fehnak lam tluan ih um mi Saihmun, Catholic Kawhhran mipi pawl le Khuadar Catholic Kawhhran mipi pawl a vehvai phah ih Kawhhran mipi pawl in hlunghlai zetin hmuahnak an rak nei. Cutin Valung Parish sung um mipi pawl khal in Bishop hmuahnak hlunghlai zetin an rak hmang a si.
Cun April 11 ni ah Bishop le a thlun tu pawl cu Simzawk khua a feh phah ah Lunghawh Parish Biakinn humhalnak, Lati khua ih Biakinn sak mi le Kulzam ih Biakinn pawl humhal nak a nei a si. Zanlam nazi 3 ah Simzawl Kawhhran mipi pawl le Rev. Fr Joseph Ro Nei Thang ih Puithiam caan kum 25 kim Silver Jubilee Puai le Simzawl Parish thar on puai, khualkhua in a ratu mipi pawl le tualsung mipi pawl in hlunghlai zet in hmuahnak an rak nei.
Cuihnu ah zanlam nazi 3:00 pm ah Jubilee Missa raithawinak a tuah. April 12 ni ah Hakha Diocese Bishop a si mi Bishop Lucius Hre Kung in Parish thar onnak Missa hoha in a tuah theh hnuah Lumbang Zone, ih tuanvo neitu Rev.Fr Thomas Ngun Za Thuan in Simzawl Parish thar ih tuanvo neitu Parish Priest a si mi Rev.Fr Joseph Ro Nei Thang hnenah Parish pakhat ih a tulsam mi Cauk pawl ap nak a nei a si. Thuthang a rak ngaitu nan zate parah Pathian in a thar in thlasuah lo pe hram seh.
Asimtu -Mai Olyvia Lal Ruat Mawi