Kawlram Catholic Bishop pawl in nunphung bomnak hnatuan pawl tuan thei dingah dil (January 15, 2022)

Kawlram Catholic Bishop pawl in nunphung bomnak hnatuan pawl tuan thei dingah dil

January 15, 2022

            Kawlram ah tuahmawh nak pawl a thang vivo nak hmun pawlah Kawlram Catholic Bishop pawl in pawlkom pawl zaten nunphung bomnak hnatuan pawl tuan thei dingah an dil. Mipi pawl nunnak la lo dingah, biakinn pawl, siizung pawl, tlawng pawl khal ah um in beu lo dingah, minung sinak le nundam theinak ding thu pek awk nak khal tuah lo ding thu, nunnak thupi ah ret dingin an dil thu, harsat a tuar tu mipi pawl a bawm tu pawlkom pawl bawm thei nak khuan ngah ding thu, an thuthan nak ah an dil.

Um nak hmun tansan tu thawng lai um

          Thuneihnak latu ralkap le Kayah, Chin le Karen ram then ih mipi pawl karlakih a cang mi doawknak pawl cu besia deuh deuh. Mawhnak nei lo mipi pawl cu rapthlak zet in an that rero. Thawng tampi raltlan in an um. Biakinn pawl khal an siat suah. Kan dung lai ah Loikaw Diocese sung Parish ih biakinn vanzam thawn bom an thlaknak in an siat suah.

Doawk nak a nasa vivo nak parah tihphannak um

          Catholic Pawlpi le nunphung mi bawm tu pawl pawlkom asimi Unicef pawl cu doawknak a tam vivo nak parah an tih phang thu an lang ter. Nauhak pawl thah nak khal nasa zet in an dodal. Ram mipi khal tuahmawh an tuar. Thuthannak ah Myanmar Catholic Bishop pawl in January 11-14 tiang thurelkhawmnak an tuah thu, atui kawlram dinhmun ruangah an thin a nuam lo zet thu, biaknak, miphun hril loin mawh nei lo mipi pawl, nauhak pawl, mi damlo pawl cu ram sungah harsa zet in an thawn thu, thawng tampi mipi pawl tlan phah in rilrawng in an um thu an sim bet.

Raltlan pawl bawmin, remdaihnak hrang thlacam nak

          Raltlan pawl ti daan a phunphun in um nak hmun a pe tu Puithiam pawl, Sister pawl hnen khal an lungawi thu, cutiin nat nak a phunphun a ngah tu mipi pawl dinhmun in dam ter nak, hnem nak pawl an ngah ding thu, cutivekin Catholic Pawlpi dinhmun khalin rampi remdaih nak hrang tthang in tuan bet dingah, ahleicein thlacam nak thawn tuah dingah forhfial in tha an pe.

Ralkap ih thuneih nak an lak ihsin thokin mi 1400 luan an thi

          Ralkap ih thuneih nak an lak nak February 1, 2021 ihsin thokin mi 1400 luan an thu ih, cumi lakah nauhak 50 hrawng an tel. Cutivekin mi 10000 luan kaih an tuar ih, cumi lakah Catholic Puithiam pawl, Pastor pawl khal an tel thu, Ralkap in Democracy cangvaih nak pawlkom pawl an thekdarh hnu hmuhsuam ih velh nak pawl khal a um thu theih a si. Himi thuthang cu Vatican thuthang ihsin kan don mi a si.

 https://bit.ly/3rb4cAQ