Kawlram RVA phunhnam ttong, zungtek zate ih zungpi National zung cu CBCM ah ong (June 9, 2024)

Kawlram RVA phunhnam ttong, zungtek zate ih zungpi National zung cu CBCM ah ong.

Kawlram RVA phunhnam ttong, zungtek zate ih zungpi cu Pyi Road, Yangon ih um mi Catholic Bishop pawl ih zungpi (CBCM) ah June thla 9 ni zanlam 5:30 ah an ong thu theih a si.

Hi caanserh cu Asian ram Bishop pawl kom ih President le Kawlram Catholic Bishop pawlkom pawl ih President a si mi Yangon, Bishop Cardinal Charles Bo in hoha in onnak caanserh a rak hmang ih Pope aiawhtu Msgr. Andrea Ferrente, archbishop pawl, Bishop pawl le ttong dangdang hmang RVA Services pawl ih tuanvo neitu Coordinator hrekkhat le staff pawl, siangbawi, sister, brothet pawl, bawmtu a hlutu pawl le khuallian pawl in tel in onnak caanserh an hmang suak a si.

The National Coordinating office of RVA Myanmar language services National zung cangsuaknak hrangah U John Aung Zaw Oo le Daw Amy Khaine Tha Zin Soe innsang in paisa ting 350 hramtohnak ah tiah an rak hlu. Caanserh hmannak cu Zung luhnak sangka pi ah Cardinal Charles Bo, Mawlamyine Bishop Maurice Nyunt Wai le sumpai thlawhtu Daw Amy Khaine tei pawl in caanserh onnak ah Phecu tannak in an thok ih National zungih ruahnak petu a si mi Rev. Fr Bernard Dashi Tang Ji le Sgaw Karen service ih tuanvo neitu Rev. Fr Saw Hubert tei pawl in signboard Phecu puan, hridai onnak an rak nei a si.

Cuihnuah Cardinal Charles Bo in Zungon nak rolung kha thluasuah pe in thucahnak a nei ih Msgr. Andrea Ferrente le national zungih ruahnak petu Rev. Fr. Bernard Dashi Tang Ji in siseh, National zungih tuanvo neitu Rev. Fr Patrick Soe Htun in thu cahnak an nei hnuah hmunkhat ten zuk tlangnak an nei ih zanriah ei tlangnak in an can hmannak an cem ter a si. Cui national RVA zung on puai ah zuknak lam ih tuanvo neitu ah CBCM-OSC director a si mi Rev Fr Paulinus Myat Kyaing le RVA Sakaw Karen le Pwo Karen ih hnatuan tu pawl siseh, Mc tuantu Sr. Lucia Thandar Aung, SJA in tuanvo la in an rak bawm a si.

RVA Language Service hmin pawl cu; Kachin Jinghpaw, Kachin Lisu, Kachin Rawang, Chin Falam, Chin Hakha, Chin Tedim, K’Cho, Karen Pwo, Karen Sgaw, le Myanmar zungthen pawl cu the National Coordinating office of RVA Myanmar language services zung thawn pehtlaih in hna an tuan tlang ding a si.

Hi mi thu hi RVA National zungin kan don mi a si. Thuthang a rak thlir ringringtu zate parah Pathian thlasuahnak um hram seh.