Kum nauhak zet mi Mithianghlim Carlo Acutis ih thlaan on ding caanserh an cawl sal July 16, 2021

Kum nauhak zet mi Mithianghlim Carlo Acutis ih thlaan on ding caanserh an cawl sal

July 16, 2021

          Nan thei lai ko ding. Kan dung kum, 2020, October 10 ni ah kumzabi 21 ih kum nautabik Mithianghlim ih nemhnget a rak si. Cui caan ah a zuk pawl thawn profile ah an rak tarlang ih Catholic mipi pawl ih facebook cahmai pawl ih rak hmuh a si. Hrekkhat in cui Mithianghlim ih zuk profile ih an ret nak kumkhat a kim thlang ding. Tui kum tiang thleng lo in a mah kel in a um lai mi tla a um.Hrekkhat in an mai fa le tu lo le thlarau lam ih an fa le pawl Baptism an pek nak ah cui Mithianghlim Carlo Acutis ih hmin an pek rero zo a si.

          A hmin cu Mithianghlim Carlo Acutis a si. A mah cu Italy miphun a si. A sinfeh cu tennis shoes le Jean bawngbi a hruk tam. A mah cu kum nauhak ten innsungsang lawngah Pathian hna a rak tuah. Ziangah tile a nu cu Catholic  a si ko nan Pathian lam ah a zuam lo lawng si lo in Biakinn a feh lo nak hman kum reipi a kim thlang. Mithianghlim a cang ding mi a fapa a hung upa vivo tikah a fapa in a sehreh ih Biakinn ah hruai in Missa sumnak ih tel dingah letkhat letkhat in Pathian thawn a nai awk ih neta lam ah a nu rori in a fapa thlun lawng si lo in a ma rori khal a thinlung ten Missa sumnak le Bawipai Thi le Sa cu a kum thawn kaih lo in rak zum tu a si.

          A mah cu technical lam ah khal a kum thawn kaih lo in enginner pawl hnak ih rak thei sawn tu a si. A mah cu Bawipai Thi le Sa a zum tuk ruangah a nauhak lai ihsin Bawipai Thi le Sa thu a dang ten tarlangnak cahmai pakhat khal a rak tuah. Cui cahmai ah Nu Catholic Pawlpi, Bawipai Thi le Sa thawn pehpar mi thawmhuham thuhla a thenthen in a rak tarlang. A nunnak a cem ah a kum 15 lawng a si lai.

          A mah cu kumzabi 21 ih Mithianghlim a si ruangah tui san mino pawl vekin Game lah a peih zet. Asinan, tikcu caan thei lo; dun le daan lo ih Game lek tu mino a si lo. A mai nikhat ih a tikcu caan, Zarhkhat sung a caan cu a mah rori in a tuah. Game leh a duh zet ko nain Zarhkhat ah nazi pakhat lo le pahnih lawng a rak lek ih a mai Biaknak lam tuanvo pawl, tlawng ca pawl, Nu le Pa bawm tul mi pawl pelh lo ih bawm ringring tu a si.

          A mah cu 1991, May 3 ah, London ah a rak suak ih 2006, October 12 ah Italy ram, Monza ah a nunnak a rak cem. July thla hlan ah cui mino Mithianghlim ih thlaan cu khawmzawhtu pawl in upat thei dingah ong ringring dingin an rak timtuah. Asinan, July 15 ah a ruak vui nak Assisi Diocese in cui caanserh cu ni an rak thawn thu an rak than. On ringring mi caanserh cu dinhmun ruangah malte sung an cawl lawk nain neta lam ah timtuah mi vek in ong sal in upat thei dingah tim an tuan ding a si.

          Hi thuthang cu CNA thuthang ih kan ngah mi a si.

https://bit.ly/3ijS1w2