Leitlun duh-aw pawl ih ni sunglawi ah Italy ram ih a ham-aw ciami nupa pawl in St.Valentine ih thluasuah dong ( February 14, 2022)

Leitlun duh-aw pawl ih ni sunglawi ah Italy ram ih a ham-aw ciami nupa pawl in St.Valentine ih thluasuah dong

February 14, 2022

          Italy ram Rome thawn a hla lo mi Terni khuapi ah a ham-aw ciami kop 40 cu St.Valentine Basilica ah duh-aw pawl ni sunloih nak hrangih tuahmi thluasuah hleice an dong.

          Terni khuapi cu Italy ram ah “duh-aw pawl ih khuapi” tiin an ti. Ziangruangahtile kum zabi 4 ihsin thokin Feb (12-14) tiang duh aw pawl ih thuanthu a suah ter tu St. Valentine ni tiin nemhnget in an tuah. Cui puaini cu duh-aw pawl lawng ih tuah siloin khuapi sung khalah cui miraltha sunloih nak in Missa raithawinak, miraltha ih rothil keng in lam vak nak pawl khal an tuah.

          Cuti cun, an rak tuah kel vekin a ham-aw mi pawl ahleice thluasuah pek nak khal a um. A ham-aw cia tu pawl cu Terni khuapi lawng ihsin an silo. Italy ram zate in himi caanserh ah tel dingah a duh tu pawl zaten an tel thei. Ahleice thluasuah cu Diocese Bishop asimi Francesco Soddu in a pe. A tu vekih tel nak thawn pehpar in Catholic thuthang zung pakhat asimi EWTN ih thusuhnak an letsalnak ah himi thluasuah donnak cu kut an sih tikah Pathian thluasuah asimi tefa thluasuah ngah dingah a si thu an sim.

          St.Valentine cu Terni khuapi a bawmtu Mithianghlim a si. Rome khuapi ih a feh laiah Terni khuapi ih Bishop a rak si thei. Culaiah Khristian pawl hrem nak a natsat laifang a si. Thuanthu ih a um mi vekin St. Valentine cu reipi thawngthlak a tuar hnu an hrem ih netabik ah lu tan a tuar. Ziangruangahtile kutsih nak cu Saramenttu pakhat asinan Rome ralkap pawl cu kutsih thei nak an pe lo. Daan vekin February 13 ni cu “thukam nak ni” tiin an tivekin cui ni ah Missa raithawi nak an tuah ih, Bawi Jesuh Thi le Sa biaknak khal a um. Khuapi zaten khal khua a thim veten an ret cia mi thinlung pianhmang kengmi mei-inn pawl an vang. Missa an theh ah Biakinn ihsin an suak ih a ham-aw tu pawl hnen St. Valentine vekin thuam aw mi mi pakhat in Biakinn suah nak ah dingin reilote ih innsang din tu ding a ham-aw tu pawl cibai bukin, pink timi senrau rong/zawng a neimi rose-pangpar an pe theu.

          Andrea cu Terni mi a si. Asinan a tu ah France ram ah a um.  A duh mi cu Russia mi asiih, Orthodox Khristian tiin khal an ko. Cutiin Catholic Pawlpi thawn theihterawknak a nei zo tiin a sim. Thluasuah tampi cu thluasuah malte hnakin a tha. A ham mi Olga khal in, thluasuah cu a hrangah a thupit thu, ziangruangahtile an kut sihnak in a thuk mi zumnak a pek thu, Pathian ih thawm huham thawn tahthim cun, minung pawl ih thil ti theinak cu sim ding tlak hman a si lo thu EWTN thuthang ah a sim. Andrea khal in, a tha mi, a hnget mi nupa si dingah le a hngetkhohmi innsang din thei dingah thla a cam thu a sim.  

 Himi thuthang cu CNA thuthang ihsin kan don mi a si.

https://bit.ly/3gTS80I