Leitlun ih ralkap mipum malbik a simi Vatican kilvengtu ralkap sungtel mipum 25 bet ding

Leitlun ih ralkap mipum malbik a simi Vatican kilvengtu ralkap sungtel mipum 25 bet ding (22.9.2022)

Tu tiang ahcun, Swiss Guards tiih kawh theumi  Vatican kilvengtu ralkap sungtel hi mipum 110 an si ih, 2025 Jubilee kum ah Vatican ah thlacam zawhtu minung tampi an ra thleng ding timi ruahsannak thawn ralkap mipum 135 kim dingah ralkap 25 bet a si ding.

Pontifical Swiss Guard timi Vatican kilvengtu ralkap hi, pope le Vatican ram humhim tu dingah ti’n Pope Julius II in 1506 kum ah a rak dinmi a si.

Himi Swiss Guards pawl cun Vatican kilvengtu ralkap lut tu ding pawl ttha teih bawm sinsin thei dingah timi ruahsannak thawn anmaih ram a simi Switzerland ah thuthang zamnak zung dinsuak dingah thukhiah an tuah zo.

Mi pakhat in Vatican kilvengtu Swiss Guard ih tel ve dingah a tanglam vekih famkimmi a si a tul: nupi nei hrihlo a si ding; Catholic a si ding; harhdam mi a si ding; Swiss miphun (Switzerland rami) a si ding; 1.74 meters (5’7”) sangmi a si ding; kum 19 le 30 karlak a si ding.

Pope an rian hlanah Switzerland ramah military training siseh, Rome le Switzerland ah special training khal an neih ta a tul.

Cule, a malbik thla 26 sung an tuan a tul.

Ralkap pakhat in kum 5 a tuan hnuah kum 3 ka tuan bet ding timi pumpeknak thawn nupi an tthi thei; asinain kum 25 kim mi si a tul.

Swiss Guard ralkap pawl umnak ding inn thar saknak dingah sumpai a hawl sak rero tu charitable foundation ih lubik, Jean-Pierre Roth cun, “A thupi bik ih kan tumtah mi cu, innsang nei mi ralkap pawl hrang innkhan tuah bet ding hi a si. Tui kan sak dingmi innpi ah innsang nei pawl hrang innkhan 25 a um ding” ti’n Catholic News Agency (CAN) hnen ah a sim.

Himi innpi thar an saknak hi, a tuih innkhan ttawm-awmi le Vatican lenglam ih inn sangmi ralkap pawl hrang umnak tha teih ngaihtuah sak thei ding tumtah ruangih sak mi khal a si.

Himi an sak theh cun, Vatican kilvengtu ralkap zaten takkholhnak khan telmi innkhan mahfek an nei thlang ding a si.

Himi Vatican ih ralkap pawl umnak innpi remtthat sal ding hi 2016 kum ihsin rak timtuah zo mi a si.

“Netabik project le budget nemhnget a si hnuah ziangtik sak thok a si ding timi cu Vatican in a ni a khiah ko ding; 2025 Jubilee kum hnu ah a si ding zum a um” ti’n Vatican Thuthang cun a sim.

Vatican Thuthang ih sim vek a sile, himi ralkap pawl umnak innpi remtthatnak dingah eros 46.4 million a cem ding ti a si.

Nunau pawl Swiss Guard ralkap tuan a ngah le ngah lo ding thawn pehpar in, “Tuih kan sak dingmi innpi hi a ra lai dingmi kum sawm tampi hrangah a si phot ih, neta lam ahcun nunau khal an tuan thei lo ding tiah zo in a rel thei ding. Pope ih thu a si ih, kannih cun thukhiah theinak kan nei lo” ti’n Roth cun CNA hnenah a sim.

https://bit.ly/3BCg42G