Leitlun killi ih kum upa bik French Catholic Sister Andre a kum 118 ah nunnak cem.

Leitlun killi ih kum upa bik French Catholic Sister Andre a kum 118 ah nunnak cem.

          Leitlun killi ih kum upa bik French Catholic Sister Andre Randon cu a kum 118 ah a nunnak a cem. Gerontology Research pawlkom ih an sim nak vekin 2022 April 19 ih Japan mi Kane Tanaka a kum 119 ih a nunnak a cem hnuah Randon cu leitlun ih kum upa bik a si.

          "Himi cu riahsait za taktak asi, asinan a duh dawt mi a naupa thlun dingah a mai rak duh zet mi a si. Amai hrang ah cun luat nak tluk asi" tiin Sainte Catherine naunei nak hmun ih David Tavella in a rak sim. Lucile Randon cu 1904 February 11 ah Frence ram Ales ah a rak suak ih kum 19 a kim ah Protestant ihsin Catholic ah a thawn. A kum 40 kim Sister a tuan hlan sung French siizungah mino nauhak le kum upa pawl hrang rian a rak tuan. 1944 ah St. Vincent De Paul ih rak din mi Daughters of charity timi ah a rak lut. Nun nak a cem zo tu a naupa ih hmin la in Sr. Andre tiin hmin a ron nei.

          Kum 70 a si hnu ah Sister Andre cu Frence thlanglam Toulon ah a thawn ih cu tawk hmun cu Sainte Catherine Laboure a cawl zo pawl ih umnak inn a si. Cutawk hmun ah khal a nunnak a cem. 2021 lai khal ah covid 19 a rak ngah. Amah cu midang pawl thawn hmun khat ah a umlo.

          Covid a rak tih asile timi thusih nak ah Sister Andre cun France ih BFM television ih a sim mi cu "ka tih lo, thih a tih lo tiin a sim. Nangmah thawn kan um cu ka lungawi asinan hmun pakhat khat ah ka upa, ka pi le ka pu thawn kan um leh ding ti ka beisei" tiin a sim.

          2019 a kum 115 suahni sungloih nak ah Sister Andre in Pope Francis hnen ih thluasuah a pekcia mi Rosary laksawng a rak dong ih cumi cu nitin ten a rak hmang. 2020 kum 116 a kimkum ah Vincent sister pawl hnen ih a sim mi cu "nitin ten nikhat ah cocoa khuatkhat a in nak le thla a cam nak cu a nunram ih san a nei bik mi a si" tiin a sim. Gerontology Research pawlkom ih an sim nak vekin atui leitlun killi ih kum upa bik cu Spain ram ih um kum 115 asimi Maria Branyas Morera asi thu an sim. Himi thuthang cu CNA thuthang ihsin kan don mi asi.

https://bit.ly/3WjbGOs