Leitlunhuap ralpi a veihnihnak a buai lai ih mi raltha Catholic Puithiam Blessed ah khaisang September 25, 2021

Leitlunhuap ralpi a veihnihnak a buai lai ih mi raltha Catholic Puithiam Blessed ah khaisang

September 25, 2021

          Leitlunhuap ralpi veihnihnak a thawh lai ih mi raltha Catholic Puithiam, Fr. Giovanni Fornasini cu Blessed ah khaisan a si.

          1943 ih pakhat a si mi thlatang caan ah lungrualnak a tuah tu pawlkom in Nazi ralkap pawl in hmunhnget zet ih an lak mi Italy ram ih khuapi pakhat a si mi ‘Bologna’ cu dimdawih lo in bomb pawl, hriamhrei pawl thawn an kap ih cimit lawlaw dingih an zuam laifang a si.

          Rampi runsuak sal thei dingah humhimnak tuanvo cu ralkap pawl in harsa zetih an zuam lai ah thlarau pawl humhimnak tuanvo a lak tu kum 28 lawng a si lai mi Italy miphun Puithiam pakhat cu ral a tlan ve ih tat dah lo le hmang dah lo ih ret mi muzuk thawn khur a rak lai.

          Cui khur laihnak cu a hrangah a sungawi tuk; Lungmankhung hnak khal in man a nei sawn. Ziangah tile sual nei lo, humhim tu nei lo ram mipi pawl bomb lak ih-sin an beu thei nak dingah a si.

          Cui Puithiam cu Fr. Giovanni Fornasini a si ih naza pawl hoha nak ngah in an mai ralkap pawl an tam lai-ah mipi pawl thlaphangih an um cu Puithiam in kohhran mipi pawl, biaknak bangawk lo nan, ral a hrial tu pawl umnak hmun pawl ah a mai thirleng pakhat thawn pumpe in a feh ih a bawm ih hnemnak a rak pek.

          Nazi pawl cu 1944, September 29 in October 5 sungah Marzabotto khua ih Italy miphun 770 cu thah an rak tuar. Cui thilcang ih thah a tuar tu pawl ih ruak cu a phum tu ding an um ko nan an tih tuk ruangah zohman in an rak vui ngam lo.

          Curuangah Puithiam in thah a tuar tu pawlih ruak zaten thluasuah pek theinak le vui theinak cu ralbawi pakhat hnenin lungkimnak a ngah ih vui dingah a rak feh.

          Riahsia za zet cu cui a khualtlawnnak ni ihsin thokin a mai thu theih a si nawn lo. A ruang khal 1945, leitlunhuap ralbuainak a reh zik zawngte lawngah an rak hmu lai. Cu ti an hmuh hnuah a ruang an cekfel salih a nunnak a cem hlan te-ah nasa zet ih thawinak hriamhma pawl an hmuh.

          Cui mi raltha Puithiam cu tui kum September 26 ah an rak nemhnget mi vekin Cardinal Marcello Semeraro in Bologna ih um San Petronio Basilica ah Blessed dinhmun ah a rak khaisang.

          Covid nat dokham nak daan ruangah cui Blessed khaisannak biakkhawm ih thlacam nak caanserh cu an ong ih khuan an pek mi mipum pawl lawng an tel ih, video thawn lawngin online in an thlah.

 Cardinal in Missa sumnak a tuah nak ih thuthangtha a simnak ah himi Blessed cu parish ih mipi pawl hrangah kilkhawitu vancungmi a si thu, amah cu thleidang ih pehtlaih awk nak a duh lo tu asi ruangah cuvek um tlan daan, uk awk daan a duh lo tu pawl ih huat nak a rak tuar.

Ral ruangaih harsat tuar pawl, inn le lo taan san in a tlan ih a relh tu pawl ngaihsak nak thawn a rak kilkhawi thu, amah cu ralbuai nak ziang tluk in a natsat khalle a tuurual pawl thawn Missa tuah sak nak, thlacam nak, Sacramentu pawl tuahsak nak, Rosary camnak pelh loin a tuah thu, thi hnai suak nak cang lo dingah thazaang, ruahnak neih tawk in zuam zet in a kham tiin a sim.   

          Blessed ih khaisang nak caanserh sungah a rak hman mi thirleng, thlalang khuat pawl le thianghlim ti ret nak bawm pawl upat a si. Cui thianghlim ti ret nak bawm cu nunnak a um nawn lo tu a taksa ah hmuh mi rothil a si. Pope Francis cu amah rori himi Blessed khaisannak ah a hoha thei lo nan sunloih nak ca a rak kuat. Cui ca sungah Blessed ih puaini cu October 13 ah tuah dingah nemhnget a si thu a lang ter.

          Himi Blessed si nak pek mi cu 1915 ah Bologna ah a rak suak. A nauhak laiah an khaan sungah ca lamah thiam lemlo mi a si tiin theih a si. Amah cu tlawng a suak hnuah san a man ih a ropi zet mi hotel pakhat ah cet thawn a her thei mi lilawn (elevator) ong sak, khar sak tu hna a rak tuan. Cuihnu lawngah Siangbawi cannak tlawngah a lut ih 1942, a kum 27 ah kumkhua Siangbawi cannak a rak la.

Himi thuthang cu Rome Reports ihsin kan don  mi a si.

Photo courtesy of National Catholic Register

https://bit.ly/3lo9zts