Mandalay Catholic Archdiocese ah oxygen cetzung thar thluasuah peknak thawn onnak puai tuah.

Mandalay Catholic Archdiocese ah oxygen cetzung thar thluasuah peknak thawn onnak puai tuah.

           Dec 15, 2022, zing 10:00 am ah lamzin 34, 69-70 lak ihum St. Thomas Puithiam tlawng sungih um Oxygen cet zung thar cu Bishop pawl in thluasuah peknak thawn onnak puai an rak tuah. Cui oxygen cetzung thar cu Mandalay Catholic Archdiocese, Social Development Sector Director, Rev. Fr. Augustine Win Myint in a rak hoha ih a hlan Caritas ih director, Rev. Fr. Peter Thant Naing Oo, St. Xavier Parish Puithiam, Rev. Fr. David Toe Wai Aung pawl ih thluasuah peknak thawn onnak puai an rak tuah.

          Oxygen cetzung dinnak cu oxygen cetzung dinnak thawngin minung pawl ih nunnak run thei dingah le oxygen a tul ih sumpai lam ti thei lo tu minung pawl zaten tumtah ih rak tuah mi a si. Caritas Mandalay – a hlan ih nunphung lungrualnak lam pawlkom ih director, Fr. Peter N

Thant Naing Oo in onpuai ah thu a rak sim ih a rak hlu tu, Austrilia ram, Jesuit pawlkom ih ahlu tu pawl le cet zung din  dingah leiram rak pek tu Mandalay Catholic Archdiocese zaten a lungawi thu a rak siim.

          Caritas Mandalay – lungrualnak pawlkom ih director Thant Zin Oo in “cet zung ih suah mi oxygen pawl cu zaangfah lainatnak thinlung thawn lawngin kan zem ding” tiah a rak sim. Oxygen cetzung ih hnatuan remcang thei dingah an tuah ding mi hnatuan hrekkhat cu Caritas Myanmar ih director Ko Thant Zin Oo ih a rak sim mi ah ‘sumpai ti thei tu pawl hrangah oxygen a lak in an zem ih cetzung reipi cangvai thei dingah siizung, siikhaan pawl a tul le man ol ten an zuar sal ding thu, hi vekin zuar phah in oxygen tuamnak lam ih tuah sak ding mi hnatuantu pawl hnenah thlahlawh pe thei dingah a tul mi hrangah le cetzung reipi remcang thei dingah oxygen hrekkhat an zuarnak a si thu’ a rak simfiang.

          Onnak puai ih a feh tu pakhat khal in ‘siizung, siikhaan an thlen tikah mina pawl oxygen pawl thawn thaw an thawt rero lai hmuh a si. A hlan ah ziang hman ih rel loin covid pulhnat a can tikah oxygen ih a thupit zia an rak hmu. A thupi zet mi hi oxygen cetzung, an din thei ruangah lawm phah in ka lungawi’ tiah a sim ih Mandalay Catholic Archdiocese ih Mandalay zaangfah lainatnak hnatuan le oxygen cetzung cang suak dingah khat lam le khat lam ih rak hruaikai sak tu pawl hnenih a lungawi thu a rak sim.

          Oxygen cetzung cu covid pulhnat sungah Australia ram ih um Jesuit pawlkom ihsin a hlutu pawl ih hlunak thawn Caritas Myanmar zung le Fr. Augustine Win Myint pawl ih bomnak thawn 2021 thla lai ihsin Mandalay Catholic Archdiocese, Caritas Mandalay in an rak hohanak thawn cetzung an rak din suak mi a si.Oxygen cet zung in nikhat ah oxygen a malbik dawng (150-200) tiang an suah thei ih oxygen cu mipi theih ih cangvaih theinak hrangah Caritas Mandalay ih director Ko Thant Zin Oo le Ko Min Han Htoo pawl in an tuan rero lai.

“Rawl loin ni (7), tidai loin zingkhat, thlithiang um loin malte sung tiin an theihthiam ruangah oxygen a tul rero tu mina pawl hrangah daih aw ten ngah thei ding thupit in kan tuah ding” tiin Caritas Mandalay- nunphung lungrualnak pawlkom oxygen zem daihnak hnatuan in an sim.