Mithianghlim John Fisher le Thomas More (June 22 )

Mithianghlim John Fisher le Thomas More (June 22 )

            Mithianghlim John Fisher le Thomas More pawl cu Siangpahrang Henry VIII ih hremnak ruangah an nunnak rak thap tu martyr pawl sungin pakhat an si ih a hleice ih hminthang tu pawl an si. Kum 1527 ah Pope Clement VII in kum 18 tiang rori Siangpahrang ih nupi a si mi Catherine Aragon thawn an thitawknak cu a hlawhtlin lo thu than dingah Siangpahrang ih dilnak pawl a rak el ruangah an remawklonak a rak thok. Anne Voleyn in Rome Catholic Pawlpi ih elnak le dawinak a rak tuar ruangah a thin a  rak heng tuk. Curuangah kum 1534 ah Siangpahrang ih thuneihnak thawn a mah le a mah England Pawlpi ih Diocese uktu dinhmun ah tuanvo a pek aw ih Catholic zumnak ih a hngetkhoh tu pawl a rak hrem thok.

           England ram ih martyr pawl cu nasa zet ih hremnak an tongih thilri parah an ret ih tinbaw par in an tul thlak. A dang pawl khal hridai thawn an teen ih an thih hlan te ah an pum an aat ih an lung an rak phroh sak. Rocheoter ih Bishop John Fisher khal in Siangpahrang cu England Pawlpi ih Diocese uktu a si thu nemhnget  dingih a el ruangah “London ih khualtlirnak inn,” ah an rak khum.

            Kum 1535 ah lutan a rak tuar ih a ruangpum le a lu cu lilawn parah ni reipi an rak tar. Bible Cathianghlim cu a kut ah keng phah in thihnak kawr huam sungah a rak lut ih a thih hlan te ah mi that tu pawl a ngaithiam thu a rak sim ta. A caan a cem tikah “Pathian hnak in Siangpahrang ka el sawn ding” tiih aunak upadi thawn pehpar in mifim Sir. Thomas More a rak thlun.

         Zumnak lam ah a hngetkhoh zet ih upat tlak zet mi lawyer cu kum 1527 Siangpahrang Henry VIII in an nupa thenawknak dingih a dilnak cu a rak el. Cui hnu kum nga a rei hnu ah Catholic Pawlpi ih dawi tuar hnak ih a tha sawn mi a dinhmun lawyer a rak tansan. A mah khal dodaltu tiah mawhpuhnak a rak tuar ih kum 1535 ah lutan a rak tuar ve. A thih hlan te ah “Kei cu Siangpahrang ih sal ka si. Asinan, a hlan pi ihsin Pathian ih ralkap ka si,” tiah a rak sim.

        

Add new comment

1 + 16 =