Myanmar Catholic Kohhran in Kawlram hrang thlacamnak ih cangvaihnak ah tel dingin biak nak tinkim hnen sawm (August 3, 2021)

Myanmar Catholic Kohhran in Kawlram hrang thlacamnak ih cangvaihnak ah tel dingin biak nak tinkim hnen sawm

August 3, 2021

            Myanmar ram ah thinphang za a simi ramkhelnak, sumdawnnak, minung covo le minung le minung karlak ih buainak tha lo zet pawl cu ralkap ih thuneih nak an long nak February 1 ihsin an tuar. Cumi dinhmun ah covid 19 a tum thum nak ih namnuai nak cu timtuah cia nak a um lomi Myanmar ram hrangah a na zet. Siivai a um loih hleiah rampi huap in minung nunnak malte a sau ter thei a thupi bik ih tulsam mi oxygen hman  an tlasam zet. Himi a nasa zet mi dinhmun ah Myanmar Catholic Bishop pawl pawlkom in pulhnat  pi ih buai nak in a zamrang bikin hlo dingah rampi hrang thlacam dingah an forh fial.

Pulhnat ih namnuainak

            Myanmar ram Catholic Bishop pawl pawlkom in duhdawt zet mi Myanmar ram mipi pawl, kan nu Myanmar rampi hrangah kut thlir in zangfah dil uh si. Nu Myanmar rampi run dingah mi tinkim ih thinlung ihsin Pathian hnen thlacam cio uh si. Nunram ih buainak pawl pah rero a si vekin mifim pawl in suanawk a ol zet mi virus pah dingah man cia in um ding a si thu ralrin nak an pek tiin tlawngkai ni khat ni ah thuthan an suah. Cui thalcam nak cu zarh hnih a rei ding.

Virus pah suak dingah pakhat lawng a simi raldonak

            Sinak a thleng mi virus ruangah nat suan nak a rang tuk vekin, oxygen um lo nak khal a tam tuk ruangah mitthi an tam. A tui dinhmun cu mipi pawl ih nundaan le sinak pawl hrangah harsat laitak caan a si. Ahleice in donak cu nat suan nak ahmaisa ah neh dingah a si. Himi dinhmun ah kanmah pawl cu nat saun a tuar tu pawl hnen nat nak thei thei ding ah check nak, oxygen pawl, a dang ahleiei ih tul mi bom nak pawl bawm cio uh si. Rampi cu mifim pawl tul caan ah harhdam nak lam hnatuan pawl zaten nat a tuar tu pawl bom dingah an forh fial. Siibawi pawl an kaih nak thu khal sim a tul. Harhdam nak hnatuan pawl ih an nunnak cu Bishop pawl in an theih pi.

Thuneihnak longnak (Aanaa tingnak) le covid 19 hnu ih a cang ding mi

            February 1, ralkap in dik lo zet in thuneih nak long in, rampi ih thuron mi Daw Aung San Suh Kyi le hril mi acozah upa pawl kaih nak cun, rampi hrang ram khelnak, nunphung, sumdawn nak, minung covo le minung khat le khat zangfah nak pawl an tlasia ter. Cumi ihsin thokin humhim nak hnatuan tu timi pawl ih tuahtuannak thawn tuilai mi tha nak hriamhrei pawl keng in dik loih thuneih nak longnak a pom lo tu mipi pawl thihnai luang tiang thah nak cu tuitiang a cem hrih lo. An cawl hrih lo. Thawngtla pawl a bomtu pawlkom AAPP pawlkom ih cazin pawl vekin nunnak a cem tu 945 an um thu tlawngkai ni khat ah an than. Ralkap a pom tu pawl cu a hlan ih ramkhel daan hlun ah an kirpi sal. Curuangah mipi hriamhrei kai pawl le mipi humhim tu pawl thawn doawk nak a cang rero. Kawl ram ih thu UN ih mi tulsam pawl bawmtu pawlkom ih an sim vek cun inn le lo tansantu 220000 an um thu theih a si.

Pathian hnen pan in beu tlang uhsi.

            Myanmar ram ih Catholic Bishop pawlkom cu ram khel tu an si lo. Mipi pawl ih thatnak lawng a ruat tu sawn an si. Curuangah mipi hrangah harhdam nak um dingah tumtah in thlacam nak ah mi zaten kut thlir in, thinlung ong in tel dingah an sawm. Himi cangvaihnak ah tel dingah zumnak a bang lomi biak nak lam hotu pawl khal hmun khat ten tel in zangfah nak thinlung cu biak nak tinkim ih zirh nak a si thu cu a tui caan ah lang ter dingah an dil.

            Kawlram ih Catholic mipi pawl hnen khal ah thlacam nak, Bawi Jesuh Thi le Sa biaknak le rosary cam nak pawl cu innsang sung, pawlkom sung ah pelh lo ten tuah rero dingah, king uh in tivekin Pathian ih sangka king in a hak zet mi hotu pawl ih thinlung nem ter dingah, harhdamnak, remdaihnak, rem awk sal nak um dingah, pulhnat pawl zaten Pathian ih kut za sang in thluasuah pe in dam ter dingah an forh fial.

Virus Ziamral ter dingnak

            Dik loin thuneih nak long nak ihsin thokin Myanmar ram ih harhdamnak cu a tha lo tuk zo. Rampi ih siizung pawl in lotheihlo ih tulmi harhdam nak kilkhawi nak khal an pe thei lo. Harhdam nak lam hnatuan a phunphun pawl cu dik loin thuneih nak long nak dodal nak in CDM (civil desobedience movement) cangvaih nak ah thazang thawn an tel. Covid 19 a tumthum nak ih namnuai nak ruangah nat suan nak cu tih a nung zet ih UN ih Kawlram aiawh tu Tom Andrews in covid 19 karlak ih do awk nak cawl dingah a cah. Nat suan nak a karh ih hleiah mitthi khal an tam vivo nan, dik loih thuneih nak long tu ralkap cun harhdam nak lam hnatuan pawl kai ih hringhro nak an tuah thotho. UN in a zamrang bik in bom nak a pek lo asile Kawlram ah thih tul lo nain a thi tu cu hitivekin an thi rero ding thu an sim.

            Kawlram ih harhdam nak zung ih covid 19 a tumthum nak ruangah ni khat ah a thi tu ca zin cu 330 an um ih, kan dung kum a cang thok ihsin tutiang ahcun nat ruangah a thi tu cu 10061 an um thu tlawngkai ni khat ah an than. A tumthum nak ah nunnak a cem tu 3689 an um thu le nat suan a tuar tu zaten 306,354 an um thu an than. Asinain, mifim thiam pawl cun, cazin dik ngaingai ahcun himi hnak ih let tam sawn a um ding thu an sim. UN ih humhim nak council khal in Myanmar ram mipum tan 54 ih a hrek luan cu natsuan an tuar thei thu kan dung kar ah an sim. Himi thuthang cu Vatican thuthang ihsin kan don mi a si.

https://bit.ly/3xs6zPH